SQO-da sońǵy eki aıda áıelderge zorlyq-zombylyq jasaǵan 100-ge jýyq er adam qamaldy
PETROPAVL. KAZINFORM – Soltústik Qazaqstan oblysynda sońǵy eki aıda otbasyndaǵy zorlyq-zombylyqqa qatysty 527 quqyq buzýshylyq tirkeldi. Kóp jaǵdaıda erkekter áıelderge qol kóterip, uryp-soqqan.
Petropavlda «AMANAT» partııasy SQO fılıaly janyndaǵy otbasy jáne halyqty áleýmettik qorǵaý máseleleri jónindegi óńirlik keńestiń otyrysy ótti.
«Osy jyldyń 2 aıynda oblysta otbasylyq-turmystyq qatynastar salasynda jasalǵan qylmystardyń sany shamamen eki ese azaıǵan. Sondaı-aq áıelderge qatysty zorlyq-zombylyq qylmystar 20% tómendedi», – dedi SQO PD jergilikti polıtsııa qyzmeti basqarmasynyń aǵa ınspektory Ásııa Ábjanova.
Áıelderge zorlyq-zombylyq kórsetkenderdiń 96-sy ákimshilik qamaýǵa alynsa, 60 adamǵa eskertý jasalǵan. Taǵy bir adamǵa aıyppul salyndy. Turmystyq zorlyq-zombylyq qurbandaryna, onyń ishinde balalarǵa arnaýly áleýmettik qyzmet usynylady. Jumyspen qamtýdy úılestirý jáne áleýmettik baǵdarlamalar basqarmasynyń málimetinshe, zardap shekkenderge turmystyq, medıtsınalyq, psıhologııalyq, eńbek, ekonomıkalyq, zań jáne basqa da baǵyttar boıynsha kómek kórsetilgen.
«Zardap shekkenderge 6 aıǵa deıingi merzimge baspanada ýaqytsha turý, mamandardyń kómegi usynylady. Ýaqytsha panajaı Beskól aýylynda ornalasqan. 20 orynǵa shaqtalǵan. 2021-2023 jyldar aralyǵynda onda turmystyq zorlyq-zombylyqtyń 175 qurbany, onyń ishinde ata-anasymen ne zańdy ókilderimen júgingen 98 bala qamtyldy. Qazirgi ýaqytta baspanada 9 balasy bar 20 áıel turyp, kómek alyp jatyr», – dedi Jumyspen qamtýdy úılestirý jáne áleýmettik baǵdarlamalar basqarmasy basshysynyń orynbasary Serik Takýmbetov.
2021 jyldan bastap SQO-da «Baqytty otbasy» otbasyn qoldaý ortalyǵy jumys isteıdi. Onda otbasy jáne neke, turǵyn úı qatynastary, eńbek zańnamasy, psıhologııalyq kómek máseleleri boıynsha zańgerlik keńes beriledi. Byltyr ortalyqtyń kómegin 1823 otbasy alǵan.
