SQO-da sońǵy bes jylda ruqsatsyz qoqys oryndary bes ese qysqarǵan

PETROPAVL. KAZINFORM — Soltústik Qazaqstan oblysynda byltyr «Qazaqstan Ǵarysh Sapary» ulttyq kompanııasy arqyly ruqsat etilmegen 62 qoqys úıindisi anyqtalǵan. Bul 2024 jyldan 54-ke az.

SQO ekologııa departamenti jyldy qorytyndylady. Vedomstvo málimetinshe, anyqtalǵan zańsyz qoqys úıindileriniń barlyǵy joıylǵan.

Qoqys tastaıtyn zańsyz oryndardyń paıda bolýyna jol bermeý úshin byltyr arnaıy jospar jáne mobıldi jumys toby quryldy. Oǵan ekologterden bólek polıtseıler jáne ákimdik ókilderi endi. 

Nátıjesinde mamandar oblys aýmaǵynda 12 reıd ótkizip, zańsyzdyqqa jol bergen alty aýyl ákimi jalpy somasy 206 myń teńge aıyppul tóledi. 

— Qazir oblys aýmaǵynda, jergilikti atqarýshy bıliktiń málimetinshe, qatty turmystyq qaldyqtardyń 444 nysany bar. Onyń 428-inde jer ýchaskesi rásimdelgen. Sondaı-aq tek jeti polıgonnyń ǵana tıisti ruqsat qujattary túgel, — deıdi departament basshysy Talǵat Sábıev.

Jalpy byltyr mamandar ekologııalyq baqylaý aıasynda 300-ge jýyq tekseris júrgizip, 214 zańbuzýshylyq anyqtalǵan. 66 ákimshilik is qozǵalyp, jalpy somasy 36 mln teńge shamasynda aıyppul salyndy. Onyń ishinde 19 mln teńge bolatyn 4 aıyppul májbúrli túrde óndirilgen.

Buǵan deıin prokýratýra «Almaty Sý» mekemesiniń ekologııalyq zańnama talaptaryn buzǵanyn anyqtaǵanyn jazǵan edik.