SQO-da sońǵy bes jylda 823 myń ga jer memleket menshigine qaıtaryldy
PETROPAVL. KAZINFORM — Soltústik Qazaqstan oblysynda paıdalanylmaı jatqan jáne jer zańnamasyn buza otyryp ıgerilgen aýyl sharýashylyǵy alqaptaryn memleket menshigine qaıtarý jumystary jalǵasyp jatyr.
SQO jer resýrstaryn basqarý departamentiniń málimetinshe, 2022-2026 jyldar aralyǵynda oblys boıynsha paıdalanylmaı jatqan 823,1 myń ga jer memleket menshigine qaıtarylǵan. Onyń ishinde 149 myń ga egistik bolsa, 612,5 myń ga jaıylymdyq jerler.
— Jer resýrstaryn memlekettik baqylaý tek jerdi qaıtarýmen shektelmeı, jer ýchaskeleriniń zań talaptaryna sáıkes paıdalanylýyn da tekseredi. Byltyr 342 tekserý júrgizilip, 192 zań buzýshylyq anyqtaldy. Bıyl jyl basynan beri 166 tekserý ótkizilip, zań talaptaryn saqtamaýdyń 85 deregi tirkeldi. Aýyl sharýashylyǵy maqsatyndaǵy jerlerdi utymsyz paıdalaný nemese múldem paıdalanbaý — eń jıi kezdesetin zań buzýshylyqtar. Osyǵan baılanysty byltyr 33 sharýashylyq, bıyl 9 sharýa qojalyǵy ákimshilik jaýapkershilikke tartyldy, — deıdi SQO jer resýrstaryn basqarý departamenti basshysynyń mindetin atqarýshy Aıtpaı Baıdıýsenov.
Jerdi uzaq ýaqyt boıy paıdalanbaý onyń memleket menshigine májbúrlep qaıtarýǵa negiz bolýy múmkin. Departament byltyr jalpy aýmaǵy 2,6 myń ga bolatyn 4 jer ýchaskesin alyp qoıǵan. Onyń 220 ga — egistik, 2,4 myń ga — jaıylym.
Bıyl 12 myń ga bolatyn 2 jer ýchaskesi alyndy. Onyń ishinde 379 ga egistik jáne 11,7 myń ga jaıylymdyq jer. Budan bólek, mamandardyń aıtýynsha, qazir jalpy aýmaǵy 39 myń ga aýyl sharýashylyǵy maqsatyndaǵy jerlerdi májbúrlep alyp qoıý týraly 5 talap aryz qaralyp jatyr. Munda da basym bóligi — 36,5 myń ga jaıylym.
— Jerdi maqsatsyz paıdalaný ǵana emes, memlekettik menshik quqyǵyn buzý faktileri de baqylaýǵa alynǵan. Byltyr jerdi zańsyz ıelený, óz betinshe paıdalaný nemese jer ýchaskesiniń shekarasyn zańsyz ózgertý boıynsha 20 fakt anyqtalǵan. Bıyl mundaı 16 fakt tirkelip, kináli tulǵalar ákimshilik jaýapkershilikke tartyldy, — deıdi Aıtpaı Baıdıýsenov.
Buǵan deıin Pavlodarda qaıtarylǵan jaıylymdyq jerler halyqqa buıyrmaı otyrǵanyn jazǵan edik.
