SQO-da «Soltústik soıasy» atty jańa baǵdarlama júzege asa bastady
PETROPAVL. QazAqparat - Soltústik Qazaqstan oblysynda «Soltústik soıasy» atty baǵdarlama qolǵa alyndy. Jańa joba dándi daqyl ósirýshilerdi qoldaýǵa negizdelgen, dep habarlaıdy QazAqparat tilshisi.
SQO Іshki saıasat basqarmasynyń málimetinshe, QR Aýyl sharýashylyǵy birinshi vıtse-mınıstri Aıdarbek Saparov pen oblys ákiminiń birinshi orynbasary Marat Tasmaǵanbetov «Soltústik soıasy» baǵdarlamasynyń josparyna qol qoıdy.
Joba birer kún buryn Aýyl sharýashylyǵy mınıstrliginde Premer-mınıstr Asqar Mamınniń tóraǵalyǵymen ótken keńeste tanystyryldy. Keńestiń nátıjesi boıynsha, soltústik óńirlerge soıa alqaptaryn ulǵaıtý tapsyryldy.
Baǵdarlama soıa ósirýdi qolǵa alǵan kásipkerlerdi memlekettik, qarjylaı qoldaýǵa baǵyttalǵan. 5 jyldyń ishinde daqyl alqabyn 1,5 mln ga-ǵa, jalpy ónimdi 3 mln tonnaǵa jetkizý josparlanǵan. Eksportty ulǵaıtyp, jańa jumys oryndaryn ashý kózdelip otyr.
«Bul baǵdarlamany júzege asyrý úshin SQO kezdeısoq tańdalǵan joq. Óńir ósimdik sharýashylyǵyn ártaraptandyrý boıynsha kóshbasshy. Qazir 1 mln ga maıly daqyldar egiledi. Jergilikti aýylsharýashylyǵy taýarlaryn óndirýshiler is júzinde astyqtyń qaldyǵy ekonomıkalyq turǵyda tıimdi ekenin kórdi. Ónimdi ótkizetin jer de barshylyq, baǵasy da qolaıly. Sondaı-aq, oblysta jer bar, sharýalar da qyzyǵýshylyq tanytyp otyr», - dedi qujatqa qol qoıý barysynda QR Aýyl sharýashylyǵy birinshi vıtse-mınıstri Aıdarbek Saparov.
Mamandardyń aıtýynsha, bıyl óńirde 14 myń ga jerge erte pisetin jáne ónimdiligi joǵary soıa tuqymy egilmek. Oblystyń aýa raıyna keletin elıtalyq jáne sýperelıtalyq tuqymdar Avstrııadan jetkizildi. Al shyqqan ónim kelesi jyly tuqym retinde qoldanylady.
