SQO-da skýter mingen 38 jastaǵy er adam qaza tapty
PETROPAVL. QazAqparat – Soltústik Qazaqstan oblysynda skýter júrgizýshisi jeńil kólikpen soqtyǵysyp, oqıǵa ornynda mert boldy, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, adam ólimimen aıaqtalǵan jol-kólik oqıǵasy «Chelıabi-Novosibir» avtojolynyń 498-shi shaqyrymynda, Mamlıýt aýdanynyń Pokrovka aýyly mańynda túnde bolǵan.
Reseılik 50 jastaǵy azamattyń «Mitsubishi Canter» kóligine bir baǵytta kele jatqan «Honda» skýteri soǵylǵan. Skýter júrgizýshisi – aýdan ortalyǵy Mamlıýtkanyń 38 jastaǵy turǵyny alǵan jaraqattarynan oqıǵa ornynda qaza tapty. Atalǵan fakti «Kólik quraldaryn basqaratyn adamdardyń jol júrisi nemese kólik quraldaryn paıdalaný qaǵıdalaryn buzýy» baby boıynsha Sotqa deıingi tergep-tekserýlerdiń biryńǵaı tizilimine engizildi. Qajetti saraptamalar taǵaıyndaldy.
Bul – jaz bastalǵaly skýter júrgizýshileriniń qatysýymen óńirde tirkelgen úshinshi jol-kólik oqıǵasy. Buǵan deıin Taıynsha aýdanynda jáne oblys ortalyǵynda da jol apaty bolǵan edi. Zardap shekenderdiń qatarynda skýter júrgizýshileri de, olardyń jolaýshylary da bar.
«Kóktem-jaz kelisimen profılaktıkalyq jumysty kúsheıttik. Júrgizýshilermen túsindirý jumystaryn júrgizip, motoshlem jáne jaryqtandyrǵysh quraldaryn paıdalaný, jyldamdyqty asyrmaý qajettigin, jol júrisi qaǵıdalaryn bilmeıtin, on altyǵa tolmaǵan tulǵalardyń kólik basqarýyna jol bermeý sııaqty basty eskertýlerdi eske salamyz. Sondaı-aq, 14 jasqa tolmaǵan velosıpedshiler, moped, skýterlerdiń júrgizýshileri joldyń oń jaǵymen júrip, jol júrisiniń basqa qatysýshylaryna kedergi jasamaýy tıis. Manevr jasar aldynda onyń qaýipsiz ekenine kóz jetkizý kerek. Skýter miný úshin jol júrisi qaǵıdalaryn bilýden emtıhan tapsyrý talap etilmese de, olardy tolyq saqtaý qajet», - deıdi SQO PD Jergilikti polıtsııa qyzmeti basqarmasynyń bastyǵy Aıdyn Baımatov.
