SQO-da sıyrdy qaqqan kólik júrgizýshisi jaýapkershilikke tartyldy
PETROPAVL. QazAqparat – Soltústik Qazaqstan oblysynda maly jolǵa shyǵyp ketken aýyl turǵyny emes, bul joly janýardy qaqqan kólik júrgizýshisi aıyppul tóledi, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 11 tamyz kúni Mamlıýt aýdanynyń polıtsııa bólimine «Mamlıýtka-Qostanaı» jolynda saǵat 9.30 shamasynda jol-kólik oqıǵasy bolǵandyǵy jóninde habarlama túsken. Mamlıýtka qalasynyń mańynda 1997 jyly týǵan jigit Mitsubishi L200 avtokóligimen sıyrdy qaǵyp ketken.
Polıtseıler jol-kólik oqıǵasynyń «Mal aıdaý» jol belgisiniń aýmaǵynda bolǵanyn anyqtady. Sıyrǵa da, júrgizýshige de, avtokólikke de zaqym kelmegen.
Medıtsınalyq kýálandyrý júrgizýshiniń ishimdik ishpegenin kórsetti. Oǵan qatysty Ákimshilik quqyq buzýshylyq týraly kodekstiń 620-baby «Jol júrisine qatysýshylarǵa qoıylatyn ózge de talaptardy buzý» boıynsha hattama toltyryldy. Sıyrdyń ıesi júrgizýshige kinárat-talaby joq ekenin aıtty.
Bul jyl basynan SQO-da maldy kólik qaǵyp ketýge qatysty ekinshi jol-kólik oqıǵasy. Alǵashqysy qańtar aıynda Taıynsha aýdanynda tirkelgen edi.
Tártip saqshylary júrgizýshiler men mal ıelerine saq bolýǵa keńes beredi. Óıtkeni aýyl sharýashylyǵy janýarlaryn jaıý qaǵıdasyn buzǵandarǵa da ákimshilik jaýapkershilik qarastyrylǵan.
Jeti aıda óńir joldarynda 97 jol-kólik oqıǵasy tirkeldi. 17 adam mert bolyp, 123 adam jaraqat aldy.
