SQO-da sıntetıkalyq esirtki saýdalap kelgen 50 jastaǵy turǵyn ustaldy
SQO Polıtsııa departamenti baspasóz qyzmetiniń málimetinshe, tártip saqshylary Aqqaıyń aýdanynyń ortalyǵy Smırnovtyń 50 jastaǵy turǵynyn «sıntetıkalyq esirtki zattaryn satty» degen kúdikpen ustady. Polıtseılerge onyń «spaıs» psıhobelsendi esirtki zatyn satýmen aınalysatyny týraly operatıvti aqparat túsken. Jedel-izdestirý is-sharalary barysynda bul málimet rastaldy.
Kúdiktiniń úıin tintý barysynda saýdaǵa shyǵarýǵa daıyndalǵan 620 doza spaıs tabyldy. Onyń jalpy salmaǵy 93 gramm. Sondaı-aq, etıl spırttiń shynylary, aq tústi untaq tárizdi zat, sıntetıkalyq esirtkige negiz bolatyn dárihanalyq shópterdiń qaptamasy alyndy. Tárkilengen zattar saraptamaǵa jiberildi.
Atalǵan fakti boıynsha QR QK 297-baby 2-b. boıynsha sotqa deıingi tergeý júrgizilip jatyr. Kúdiktige qatysty qamaýǵa alý bultartpaý sharasy qoldanyldy.
Jyl basynan SQO aýmaǵynda esirtkige qatysty 151 derek anyqtalsa, onyń 55-i aýyr jáne asa aýyr túrine jatady, sondaı-aq 34 satý faktisi tirkeldi. Zańsyz aınalymnan 393 keliden astam esirtki zaty, onyń ishinde 114 gramnan astam geroın, 93 gramm kokaın jáne 1 keliden artyq túrli sıntetıkalyq esirtki alyndy. Qylmystyq jaýapkershilikke 94 adam tartyldy.
