SQO-da sıntetıkalyq esirtki satyp kelgen ınternet-dúkenniń jumysy toqtatyldy

PETROPAVL. QazAqparat – Soltústik Qazaqstan oblysynda tártip saqshylary sıntetıkalyq esirtki satýmen aınalysatyn ınternet-magazındi uıymdastyrdy degen kúdikpen Petropavl qalasynyń eki turǵynyn ustady, dep habarlaıdy QazAqparat tilshisi.

SQO Polıtsııa departamenti baspasóz qyzmetiniń habarlaýynsha, esirtki saýdagerleri 8 qańtar kúni ustaldy. 30 jáne 28 jastaǵy eki jigittiń jalǵa alǵan páterinen satýǵa daıyndalǵan zattar: «tuz», «spaıs», jazbalar, SIM kartalar, smartfondar tárkilendi. Sonymen qatar, ishinde 250 gr jýyq sıntetıkalyq esirtki bar úlken polımer orama tabyldy. Barlyq zat saraptamaǵa joldandy.

«Sıntetıkalyq esirtkini taratýda joǵary tehnologııalyq ádisterdi qoldaný –jumysymyzdaǵy eń basty qıynshylyqtyń biri. Taratýshy qashyqtyqtan áreket etedi, esirtkini belgili jerge salýshy – taratý tizbegindegi eń tómengi býyn – ol taratýshyny kórmeıdi, tek jabyq elektrondyq arnalar arqyly baılanysqa shyǵyp turady. Alaıda, egjeı-tegjeıli jedel jumystyń nátıjesinde atalǵan ınternet-resýrsty uıymdastyrǵan kúdiktiler anyqtaldy», - deıdi SQO PD esirtki qylmysyna qarsy is-qımyl basqarmasynyń bastyǵy Jandos Basybaev.

Atalǵan fakti «Esirtki, psıhotroptyq zattardy, sol tektesterdi ótkizý maqsatynda zańsyz daıyndaý, qaıta óńdeý, ıemdený, saqtaý, tasymaldaý, jóneltý ne ótkizý» boıynsha Sotqa deıingi tergep-tekserýdiń biryńǵaı tizilimine engizildi. Eki kúdikti qamaýǵa alyndy.

Byltyr tártip saqshylary esirtki zattaryn satýmen aınalysqan 162 ınternet-dúkendi anyqtady. Odan basqa 1 esirtki zerthanasynyń jumysy toqtatyldy.