SQO-da sıntetıkalyq esirtki satqan 22 jastaǵy kúdikti ustaldy

PETROPAVL. KAZINFORM – Petropavlǵa Qaraǵandy oblysynyń turǵyny psıhotroptyq zattardy taratý maqsatynda arnaıy kelgen degen kúdik bar. 

Soltústik Qazaqstan oblysy polıtsııa departamenti baspasóz qyzmetiniń málimetinshe, tekserý kezinde odan untaq tárizdi zat salynǵan 21 orama jáne ishinde osyndaı 30 oramasy bar paket tárkilendi. Saraptama nátıjesinde bul «mefedron» ekeni anyqtaldy, jalpy salmaǵy 76 gramm.

Polıtseılerdiń aıtýynsha, «mefedron» – asa qaýipti psıhotroptyq zattardyń biri. Ol basqa sıntetıkalyq esirtkilermen salystyrǵanda tez táýeldilik týdyrady.

Kúdiktini «Qarasora» jedel-profılaktıkalyq is-sharasy aıasynda ustady. Jigit qamaýǵa alynyp, sotqa deıingi tergeý bastaldy.

Departamenttiń málimetinshe, bıylǵy 8 aıdyń ishinde SQO-da zańsyz aınalymnan 475 keliden astam túrli esirtki zaty alyndy. Onyń ishinde 4 keliden astamy – asa qaýipti sıntetıkalyq esirtkiler. Jyl basynan beri polıtseıler 196 esirtki qylmysyn áshkerelep, sonyń 94-i satý faktisi boldy.

Buǵan deıin SQO-da túrmege esirtkini dárethana qaǵazy arqyly kirgizbek bolǵanyn jazǵan edik.