SQO-da sınoptıkter kóktem men jaz mezgiline arnalǵan aýa raıy boljamyn jasady
PETROPAVL. KAZINFORM – Soltústik Qazaqstan oblysynda kóktem men jazda aýa raıy qandaı bolmaq?
Óńirlik kommýnıkatsııalar qyzmetinde ótken brıfıngide «Qazgıdromet» RMK SQO fılıaly mamandary aýa raıynyń boljamymen bólisti.
— Sáýirde aýanyń ortasha temperatýrasy +6…+7oS bolmaq, bul ádettegiden 1 — 2oS joǵary (norma 4,2…5,6 oS). Birinshi jáne ekinshi onkúndikte temperatýra túnde +4…+9 oS, kúndiz +11…+16 oS, keı jerlerde synap baǵanasy +19 oS deıin kóteriledi. Tek keı kúnderi sýyq aýa aǵyny saldarynan túnde aýa temperatýrasy 0…-5 oS, kúndiz 0…+5 oS deıin tómendeıdi dep boljanyp otyr. Úshinshi onkúndikte aýa temperatýrasy túnde +5+10°S-tan 0…+5°S-qa deıin, kúndiz +18+23°S-tan +10+15°S-qa deıin birtindep tómendemek, - deıdi «Qazgıdromet» RMK SQO fılıaly gıdrometeorologııalyq monıtorıng bóliminiń basshysy Dáýren Qosshyǵulov.
Sáýirde negizinen norma deńgeıinde jańbyr jaýady, ekpini 15-20 m/s jetetin jıi jel turady.
Mamyr aıy da jyldaǵydan jyly bolmaq (norma: +13+14 oS). Desek te keı kúnderi qysqa merzimge kún sýytyp, túngi ýaqytta termometr baǵany 0-5 oS jyly, keı jerlerde -2 oS aıaz, kúndiz +12+17°S bolmaq.
— Sýyq kúnder uzaq turmaıdy. Mamyrda keı kúnderi kúndiz +20-25, keı jerlerde +30 oS deıin jylynady. Mamyr aıynda jaýyn-shashyn mólsheri oblys boıynsha birkelki emes, 22-43 mm-ge deıin túsedi, bul klımattyq normaǵa sáıkes keledi (norma 25…39 mm). Al jaz ortasha ystyq, jekelegen kúnderi synap baǵanasy +28+35 oS deıin kóteriledi, - deıdi sınoptık.
Maýsym aıynda oblys aýmaǵynda aýanyń ortasha temperatýrasy normaǵa sáıkes, 17…20 oS boljanǵan. Naızaǵaı oınap, ekpini 15-20 m/s deıin jetetin jel, shańdy daýyl turady. Jaýyn-shashyn normaǵa sáıkes bolmaq.
— Shilde aıynda aýa temperatýrasy +18…20oS aralyǵynda boljanǵan. Tamyzda aýanyń ortasha temperatýrasy normadan 1° joǵary bolady (norma 17,0…18,2).
Tamyz aıynda jaýyn-shashyn mólsheri oblys aýmaǵynyń basym bóliginde normadan az bolady dep boljanǵan, - deıdi oblystyq fılıal mamany.
Buǵan deıin Petropavlda halyqaralyq mańyzy bar jol ýchaskesin sý basqanyn jazǵan edik.