SQO-da sibir jarasynyń 161 oshaǵy bar

PETROPAVL. QazAqparat – Soltústik Qazaqstan oblysynda sibir jarasy taraýy múmkin qolaısyz 161 oshaq bar. Byltyr óńirde bir adam túıneme juqtyrdy, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamenti baspasóz qyzmetiniń málimetinshe, óńirde sibir jarasy boıynsha 2018 jylǵa deıin statsıonarlyq qolaısyz pýnktter sany 149 bolsa, qazir aýrý oshaqtarynyń sany 161-ge jetken.

«Sibir jarasy - janýarlar men adamdardyń asa qaýipti juqpaly aýrýy, kóbinese ólimmen aıaqtalady. Sibir jarasynyń qozdyrǵyshy - bakterııasy ottegige qol jetkizgen kezde sporalar túzedi. Janýarlar sibir jarasyn qozdyrǵyshy bar topyraqtan jáne shópten juqtyrady, bul aýrýdy týdyratyn mıkrobtar ondaǵan jyldar boıy saqtalýy múmkin jáne belgili bir jaǵdaılarda kóbeıedi. Adamdar kúıdirgini aýrý maldardan juqtyrady. Sibir jarasy adamnan adamǵa berilmeıdi», - deıdi asa qaýipti ınfektsııalardy jáne týberkýlezdi epıdemıologııalyq qadaǵalaý bóliminiń jetekshi mamany Nurgúl Moldaǵalıeva.

Byltyr shamamen otyz jyldy araǵa salyp, SQO Aqjar aýdanynda bir adam mal etinen kúıdirgi juqtyrdy.

Bıyl, ázirge epıdemıologııalyq jaǵdaı qolaıly.

«Adam kúıdirgi juqtyrǵanda onyń dene qyzýy birden 39-40°C deıin kóteridledi. Aýrýdyń bakterııasy teriniń jaraly kesilgen, syzattary bar, jyrylǵan jerge túsip, jaralar paıda bolady; ókpe tusy aýyryp, entigedi, qandy qaqyryq túsip, pnevmonııaǵa ulasady. Іshi ótip, qandy dıareıa, qusý, meteorızm bolýy múmkin. Inkýbatsııalyq kezeń, ıaǵnı adam ınfektsııa juqtyrǵan sátinen bastap alǵashqy belgilerdiń paıda bolýy birneshe saǵattan bir aptaǵa deıingi ýaqytty quraıdy, kóbinese bul kezeń 2-3 kúnge sozylady», - deıdi Nurgúl Moldaǵalıeva.

Sibir jarasymen aýyrý respýblıkada ózekti másele. Qazirgi ýaqytta respýblıka aýmaǵynda sibir jarasynyń 2623 oshaǵy bar.

1948 jyldan 2021 jylǵa deıin sibir jarasynan 25 myńnan astam túlik qyrylǵan jáne 2 myńǵa jýyq adam aýyrǵan.

Al bıyl elimizde eki adamǵa kúıdirgi dıagnozy qoıylsa, sonyń bireýi aýrýdan qaıtys boldy.