SQO-da sibir jarasy tabylǵan Aqjar aýdany tórt aımaqqa bólindi
PETROPAVL. QazAqparat – Soltústik Qazaqstan oblysynda sibir jarasynyń oshaǵy anyqtalǵan Aqjar aýdany tórt aımaqqa bólindi, dep habarlaıdy QazAqparat tilshisi.
Qaýly ashyq normatıvti-quqyqtyq aktiler saıtynda jarııalandy . Іri qara mal arasynda asa qaýipti sibir jarasy ınfektsııasynyń anyqtalýyna baılanysty aýrýdy joıý jáne onyń odan ári taralýyna jol bermeý boıynsha arnaıy veterınarııalyq is-sharalardy josparlaý jáne tıimdi júrgizý maqsatyndaaýdan tórt aımaqqa bólindi. Birinshisi - epızootııa oshaǵy men «Aq-Nıet-Agro ı K» JShS tıesili jaıylymdy qamtıtyn epızootııa oshaǵynan 6 km radıýstaǵy qolaısyz aımaq.
Ekinshisi – býferlik aımaq. Qolaısyz aımaq shekarasynan 3 km radıýsty qamtıdy.
Úshinshisi – býferlik aımaqtan keıin 3 km radıýsty qamtıtyn baqylaý aımaǵy. Oǵan Novoselsk aýyldyq okrýgine qaraıtyn Gorkov aýyly men JShS jaıylymy kiredi.
Tórtinshisi - Voshod aýyldyq okrýgi Voshod aýylyn, Uıaly aýyldyq okrýgi Uıaly aýylyn, Maı aýyldyq okrýgi Maı aýylyn qamtıtyn baqylaý aımaǵynyń shekarasynan tysqary qolaıly aımaq.
Esterińizge salaıyq, Novoselsk aýyldyq okrýginiń ákiminiń sheshimimen 25 tamyzda epızootııa oshaǵynda karantın belgilendi. Nur-Sultan qalasyndaǵy Veterınarııa boıynsha ulttyq referenttik ortalyqta júrgizilgen zertteý nátıjeleri boıynsha Aqjar aýdany Novoselsk aýyldyq okrýginde ornalasqan «Ak-Nıet-Agro ı K» JShS tıesili shalǵaıdaǵy jaıylym aýmaǵynda iri qara mal arasynda sibir jarasy aýrýy tirkeldi. Infektsııa eki malda tabyldy. Jalpy aýrý anyqtalǵan oshaqta 677 iri qara mal bar.
«Infektsııa oshaǵy eldi mekenderden jáne janýarlardy ustaıtyn basqa da sharýashylyqtardan edáýir qashyqta ornalasqan. Shalǵaıdaǵy jaıylymdardyń oqshaýlyǵy, sondaı-aq aýyrý deńgeıiniń tómendigi arnaıy veterınarııalyq is-sharalardy ýaqtyly jáne tolyq júrgizgen jaǵdaıda aýrýdyń taralý jaǵdaıyn baqylaýǵa múmkindik beredi. Aýyldyq okrýg eldi mekenderiniń asa tyǵyz bolmaýynan olardyń arasyndaǵy epızootııalyq jáne sharýashylyq aralyq baılanystar az, bul sibir jarasynyń keń taralý aýqymyn azaıtady», - delingen túsindirme jazbada.
Buǵan deıin SQO-da aýyl turǵynynyń kúıdirgi juqtyryp, aýrýhanaǵa túskenin aıtqan edik .
