SQO-da shyrsha kesken eki adam ustaldy
PETROPAVL. QazAqparat – Soltústik Qazaqstan oblysynda qylqan japyraqty aǵashty kesken eki turǵynnyń árqaısysy endi 30 AEK mólsherinde aıyppul tóleýleri múmkin, dep habarlaıdy QazAqparat tilshisi.
SQO Polıtsııa departamenti baspasóz qyzmetiniń málimetinshe, Mamlıýt aýdanynyń 40 jastaǵy turǵyny Jańa jyl meıramyna oraı úıine shyrsha ornatpaq bolady. Sol úshin avtojoldyń boıynda ósip turǵan aǵashty kesip alǵan. Al Qyzyljar aýdanynyń turǵyny qylqan japyraqty aǵashty Krasnoıarskıı orman sharýashylyǵynyń aýmaǵynan kesip jatqan kezinde ustalǵan. Endi ekeýi de sot aldynda jaýap beredi. Shyǵyn mólsheri anyqtalyp jatyr.
Óńirde «Shyrsha» jedel-profılaktıkalyq is-sharasy ótip jatyr. Onyń aıasynda tabıǵatty qorǵaý polıtsııasy kúndelikti reıdter uıymdastyrady. Shyrsha kesken eki turǵyn da osyndaı is-shara barysynda ustalǵan.
«Shyrsha kesý derekteri óte sırek kezdesedi. Soltústikqazaqstandyqtar aǵashty zańsyz keskennen góri arnaıy saýda oryndarynan satyp alǵandy jón kóredi», - deıdi SQO PD Jergilikti polıtsııa qyzmeti basqarmasy tabıǵatty qorǵaý polıtsııasy bóliminiń bastyǵy Sergeı Lıpko.
Onyń aıtýynsha, qylqan japyraqty aǵashtyń qaıda óskeni mańyzdy emes, oǵan zaqym keltirgen brakonerge 10, 20 nemese 30 AEK mólsherine deıin aıyppul salynady. Bul - memleketke keltirilgen shyǵyn 100 AEK aspaǵan jaǵdaıda.
Jalpy jyl basynan oblysta aǵashty, sonyń ishinde qaıyń men terekti zańsyz kesýdiń 52 deregi anyqtaldy. Zańsyz ań aýlaǵan - 15, balyq aýlaǵan 11 adam ustaldy. Ańshylyq pen balyq aýlaý talaptaryn buzǵan 800-den astam adam ákimshilik jaýapkershilikke tartyldy.
