SQO-da «shoshqa» jáne «gonkong» tumaýy tirkeldi

PETROPAVL. QazAqparat – Soltústik Qazaqstan oblysynda sýyq tıip naýqastanǵandar sany ótken jyldyń osy kezeńimen salystyrǵanda 1,5 esege artty. Otbasymen aýyryp jatqandar bar, dep habarlaıdy QazAqparat tilshisi.

SQO sanıtarııalyq-epıdemıologııalyq baqylaý departamentiniń basshysy Áset Jumataevtyń aıtýynsha, óńirde JRVI boıynsha epıdemıologııalyq jaǵdaı syrqattanýshylyqtyń maýsymdyq ósýimen sıpattalady. Epıdemıologııalyq maýsym bastalǵan 1 qazannan beri aýyrǵandardyń 65%-y – 14 jasqa deıingi balalar.

Oblys aýmaǵynda tumaý órshigen. Óńirde V tıpti tumaýdyń zerthanalyq rastalǵan 244 jaǵdaıy tirkeldi. 8 adam «shoshqa» tumaýyn juqtyrsa, jaqynda «gonkong» tıpti atanǵan tumaýdyń 3 jaǵdaıy anyqtaldy.

«Sımptomdary da, emdeý joldary da birdeı. Buryndary tumaý qańtar-aqpan aılarynda, ıaǵnı Jańa jyldan keıin tirkeletin. Bıyl erte bastaldy. Otbasymen aýyryp jatqandar bar. Óıtkeni, tumaý bolsyn, jedel-respıratorlyq vırýstyq ınfektsııa bolsyn aýa tamshylary arqyly, turmystyq zatpen taralady. Sondyqtan, bir bólmede, bir páterde turǵandyqtan juqtyrmaý múmkin emes», - deıdi Áset Jumataev.

Aýyrǵandardyń 49-y júkti áıel bolsa, 78-i bala, sonyń ishinde 44 oqýshy jáne 8 balabaqsha tárbıelenýshisi bar. Tumaýdy juqtyrǵandardyń jartysyna jýyǵy – Petropavl turǵyndary.