SQO-da shomylýǵa bolatyn 60 oryn belgilendi
SQO Tótenshe jaǵdaılar departamentiniń bastyǵy Ramıl Kamalovtyń aıtýynsha, oblys aýmaǵyndaǵy buqaralyq demalys ornynyń altaýy – kommýnaldyq menshikte, qalǵan 54-in jeke kásipkerler jalǵa alǵan.
«1 maýsym – ózen-kólderde shomylý kezeńi bastalady. Oqys oqıǵalarǵa jol bermeý maqsatynda profılaktıkalyq jumys júrgizilip jatyr. Desek te júıelik sıpattaǵy birqatar kemshilik bar, aýyldyq okrýgter ákimdikteri tarapynan aldyn alý jumystarynyń jetkiliksizdigin, úgit materıaldarynyń azdyǵyn kóremiz. Adamdardyń sýda qaýipsiz demalýyn uıymdastyrýda, ásirese, buryn adam ólimi tirkelgen jerlerde olqylyqtar kezdesedi. Keı jerlerde «Shomylýǵa tyıym salynady» belgileri eskirgen nemese julynyp qalǵan», - deıdi departament basshysy.
SQO-da sońǵy 10 jylda 216 adam sýǵa batyp ketti, onyń 34-i bala. Byltyr 5 adamnyń, sonyń ishinde bir balanyń ajaly sýdan boldy.
«Sýǵa ketkenderdiń 90% mas bolǵan, byltyr 31 adam qutqaryldy, olardyń da spırttik ishimdik iship sýǵa kirgeni anyqtaldy. Shomylý kezeńinde Departament kún saıyn polıtsııa qyzmetkerlerimen birge ortaq sý paıdalaný erejeleriniń jáne qoǵamdyq jerde spırttik ishimdikterdi ishýge jol bermeý maqsatynda reıdter júrgizedi. Jylyna orta eseppen 400-den astam adam ruqsat etilmegen jerde shomylǵany úshin, 600-den astam adam sý basynda, qoǵamdyq oryndarda spırttik ishimdikter ishkeni úshin jazalanady», - deıdi Ramıl Kamalov.
Departament bastyǵynyń aıtýynsha, shomylý kezeńinde balalardyń qaýipsizdigi máselesi de ótkir tur, óıtkeni kámeletke tolmaǵandar kóbinese ata-analar men eresekterdiń qaraýynsyz qalady eken.
Buǵan deıin habarlanǵandaı, Astanada shomylýǵa bolatyn - 4 oryn, ShQO-da - 14 oryn, Abaı oblysynda - 10 ýchaske, Almaty qalasynda 4 oryn belgilengen bolatyn.
