SQO-da shomylý maýsymy bastalǵaly ózen-kólderde 17 adam kóz jumdy
PETROPAVL. QazAqparat – Soltústik Qazaqstan oblysynda jaz bastalǵaly 17 adam sýǵa ketti, bul ótken jylmen salystyrǵanda 70 paıyzǵa artyq, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, búgin oblystyq ákimdikte óńir basshysy Qumar Aqsaqalovtyń tóraǵalyǵymen sýǵa shomylý maýsymynda qaýipsizdikti qamtamasyz etýge qatysty jıyn ótti.
Departament basshysy Ramıl Kamalov jınalǵandardy jaǵdaımen tanystyryp, qaýipsizdikti qamtamasyz etýge arnalǵan is-sharalar jaıynda aıtty.
«Karantın shekteýleriniń jeńildeýine baılanysty oblystyń ózen-kólderine demalýǵa baryp, sýǵa shomylýshylar sany artty. Maýsym bastalǵaly 17 adam sýǵa ketti. Ótken jylmen salystyrǵanda bul 12 adamǵa, ıaǵnı 70 %-ǵa kóp. Jazataıym oqıǵalardyń barlyǵy sýǵa shomylýǵa ruqsat etilmegen jerlerde bolǵan», - deıdi Ramıl Kamalov.
Departament basshysynyń aıtýynsha, vedomstvo sýdaǵy oqys oqıǵalardyń aldyn alý maqsatynda barlyq tıisti sharalardy qolǵa alǵan.
SQO-da adam ómirine qaýipti birneshe sý qoımasy bar. Olar: Esil ózeni, Pestroe, Solenoe, Lebıaje, Úlken Torańǵul, Shalqar jáne Imantaý kólderi. Halyq arasynda bul sý qoımalary jaqsy demalys orny retinde tanymal, alaıda arnaıy jaraqtandyrylmaǵan jerge shomylýdyń qaýipti ekenin umyttpaǵan jón.
Jıynǵa polıtsııa departamentiniń, kásipkerlik, tabıǵı resýrstar jáne tabıǵatty paıdalanýdy retteý basqarmalarynyń mamandary, Petropavl jáne oblys aýdandarynyń ákimderi, basqa da múddeli mekeme-uıymdardyń ókilderi qatysty.
SQO ákimi aldyn alý is-sharalaryn arttyryp, ózen-kólderdiń aýmaǵyna jıi reıdter uıymdastyrýdy tapsyrdy.
