SQO-da shomylý maýsymy bastalǵaly 8 adam ajal qushty
PETROPAVL. QazAqparat - Soltústik Qazaqstan oblysynda sýǵa shomylý maýsymy bastalǵaly 8 adam qaza tapty, onyń úsheýi - jasóspirim, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń málimetinshe, oblystyń ózen-kólderinde 16-18 maýsym kúnderi eki jasóspirim sýǵa ketken. Petropavl mańynda ornalasqan «Polet» saıajaı qoǵamdastyǵynda eki jasóspirim Esil ózenin júzip ótpek bolady. Alaıda, jaǵaǵa bireýi ǵana jetken. Prıbrejnoe eldimekeniniń turǵynyn qutqarýshylar tek ekinshi kúni ǵana taýyp, jansyz denesin alyp shyqty. Al kelesi kúni qaıǵyly oqıǵa Ýálıhanov aýdanynda qaıtalandy.
«Kishkenekól aýylynyń mańynda qoldan jasalǵan kólge 15 jastaǵy jasóspirim batyp ketti. Ol jer sýǵa túsýge jaraqtandyrylmaǵan. Balanyń denesin qutqarýshylar sol kúni keshke tapty», - deıdi departament mamandary.
Qaıǵyly jaǵdaılardyń aldyn alý úshin SQO TJD Jedel-qutqarý otrıadynyń mamandary kúndelikti adam kóp shoǵyrlanǵan jerlerge: saýda oryndaryna, bazarlar men dúkenderge baryp, túsindirý jumystaryn júrgizedi, jadnamalar taratady.
«SQO-da 60-qa jaqyn sýǵa shomylýǵa arnalǵan oryn bar. Ózen-kólderdegi arnaıy oryndarda jelsiz kúnderi, +25- +30 gradýs aýa raıynda shomylýǵa keńes beremiz. Mas kúıde, sýyqta shomylmańyzdar. Sińir tartyp nemese mıdyń qan tamyrlary qysylýy múmkin. Balańyzdy kózden tasa qylmaı, qaýipsizdik erejelerin saqtańyz», - dep keńes beredi mamandar.
Óńirde sońǵy 5 jylda 168 adam sýǵa ketken, onyń 22-si jasóspirim. Qutqarýshylar 100-den astam adamǵa der kezinde kómek kórsetip, ólimnen arashalap qaldy.
