SQO-da shoqyný meıramyna oraı sýǵa túsetin 27 oryn daıyndalady
SQO tótenshe jaǵdaılar departamenti bastyǵynyń orynbasary Murat Qanǵojınovtyń aıtýynsha, bul kúnderi barlyq deńgeıdegi ákimdiktermen, polıtsııamen daıyndyq jumystary júrip jatyr. Sýǵa shomylýǵa jáne ydystarǵa sý alýǵa óńirde 27 oryn daıyndalady. Onyń ekeýi Petropavlda, toǵyzy Ǵabıt Músirepov atyndaǵy aýdanda, altaýy Qyzyljar aýdanynda, tórteýi Aıyrtaýda jáne ekeýden Shal aqyn, Esil jáne Jambyl aýdandarynda bolady.
«Іs-shara bastalmas buryn departament mamandary sý oıyqtaryn tekserip, qaýipsiz bolýyn qadaǵalaıdy. Budan basqa sýǵa shomylý oryndarynda TJD, polıtsııa departamentiniń qyzmetkerleri, jedel járdem qyzmeti jáne jergilikti bılik ókilderi kezekshilik atqarady. Bul jumysqa 300-ge jýyq adam, 119 tehnıka tartylmaq.
Bul dinı meıram pravoslavtyqtar arasynda ǵana emes, basqa din ókilderi arasynda da atalyp, sol kúni muzdaı sýǵa shomylýshylar qatary arta túspek. Máselen ótken jyly muz oıyqqa kelip túskender jáne sý alǵandar sany 5 myńnan asqan», - deıdi Murat Qanǵojınov.
Qutqarýshylar oqys oqıǵalardyń aldyn alý úshin qaýipsizdik erejelerin de eske saldy.
«Muzdaı sýǵa spırttik ishimdik iship túsýge bolmaıdy. Aıaqqa yńǵaıly, syrǵanamaıtyn jáne sý bolmaıtyn qosymsha aıaq kıim alý qajet.
Basy jáne qan tamyrlary aýyratyndarǵa sýǵa túsýge tyıym salynady. Sýǵa súńgigen kezde tamyrlar kenetten tarylyp, bul ınsýltke ákelýi múmkin.
Sýda 1 mınýttan artyq bolýǵa bolmaıdy.
Sýǵa shomylyp shyqqannan keıin ystyq shaı ishýge keńes beremiz.
Sondaı-aq muz ústine avtokólikpen kirýge tyıym salynǵan. Bir mezette 20 adamnyń bolýy da asa qaýipti», - deıdi Murat Qanǵojınov.
«Qazgıdromet» RMK málimetinshe, 19 qańtar kúni SQO aýmaǵynda aýa temperatýrasy kúndiz – 8 -13 gradýs, al túnde -23-28 gradýs bolady dep kútilýde.
