SQO-da «Shoqany bar el – shoqtyǵy bıik el» kórmesi ashyldy
Ýálıhanovtar áýletine qatysty biregeı jádigerlerdi Petropavldaǵy Abylaı han rezıdentsııasy mýzeı-kesheninen kórýge bolady. Sh.Ýálıhanov atyndaǵy Syrymbet tarıhı-etnografııalyq mýzeıi qala turǵyndary men qonaqtarynyń nazaryna 30-dan asa eksponatty ákelgen.
«Syrymbet qasıetti de, kıeli meken. Syrymbet elinen Sh.Ýálıhanovtyń mýzeıinen jáne de Shoqannyń ájesi Aıǵanym qonysynan «Shoqany bar el – shoqtyǵy bıik el» atty kórmeni uıymdastyryp ákeldik. Kelýshiler bul jerde Ýálıhanovtar áýletine tıesili buıymdardy, qundy qujattardyń jáne Shoqan salǵan sýretterdiń fotokóshirmelerin kóre alady», - deıdi Sh.Ýálıhanov atyndaǵy Syrymbet tarıhı-etnografııalyq mýzeı dırektorynyń mindetin atqarýshy Nurgúl Qulbaeva.
Qundy jádigerlerdiń biri - Shoqannyń saıahatqa ózimen birge alyp júrgen aǵashtan jasalǵan jol sandyǵy. Qashǵarııaǵa sapary kezinde onyń ózimen birge alyp júrgen jez quman men samaýyryn da kórmeden kórýge bolady. Taǵy bir eksponat - 1812 jylǵy Máskeý qalasyndaǵy shokolad fabrıkasynyń syrty qańyltyrdan jasalǵan shokolad qoraby. Shoqannyń nemese Peterbýrgte 11 jyl turǵan Shoqannyń inisi Maqynyń sol zamandary týystaryna alyp kelgen baǵaly syılyqtarynyń biri.
«Shoqanmen birge ósken daryndy aǵa-inileri bolǵan. Sondaı inileriniń biri - Maqy Ýálıhanov. Maqy sýretshi bolǵan. Ol Peterbýrgtaǵy kereń–mylqaýlar mektebinde oqyp, bilim alǵannan keıin túrli ǵylymı mekemeler men kitaphanalarda sýretshi bolyp isteıdi. Maqy Ýálıhanov 1855-1866 jylǵa deıin Peterbýrgte turǵan. Onyń qolynan shyqqan qazaq kórkem óneriniń tamasha úlgileri 1876 jyly shyǵystanýshylardyń ІІІ halyqaralyq kongresinde júldege ıe boldy», - deıdi Nurgúl Qulbaeva.
Maqynyń óz qolymen jasaǵan, pil súıekterinen qurastyrylǵan jeke sandyǵy kópshiliktiń qyzyǵýshylyǵyn týdyrary anyq. Budan basqa Shyńǵystyń altyn jippen kestelengen belbeýi, Shoqannyń ájesi Aıǵanymnyń qamzoly kórmeden oryn aldy.
Aıyrtaý aýdanynyń jyljymaly kórmesi Petropavlda bir aı boıy jumys istemek.
