SQO-da ishimdikten bas tartqan aýyldar sany 35-ke jetti
PETROPAVL. KAZINFORM — Soltústik Qazaqstan oblysyndaǵy Qaratal aýyly spırttik ishimdikten bas tartqan aýyldar qataryna qosyldy.
Qaratal — Esil aýdanyndaǵy tórtinshi «ishimdiksiz aýyl». Aýyl turǵyndary araq-sharaptan sanaly túrdi bas tartyp, osy sheshimge oraı chellendj uıymdastyrdy. Іs-sharany ótkizýge jergilikti atqarýshy organdar, polıtsııa jáne prokýratýra qyzmetkerleri qoldaý kórsetti. Aýyl turǵyndary kóshede skandınavııalyq júrispen ótip, salamatty ómir saltyn nasıhattady jáne chellendjdi Mamlıýt aýdanyna joldady.
Qaratal aýyly Nıkolaev aýyldyq okrýginiń quramyna kiredi. Qazir eldi mekende 19 úı qalǵan, elýden astam turǵyny bar.
Esil aýdany polıtsııa bóliminiń bastyǵy Rýslan Muhambetjanovtyń aıtýynsha, bul eldi mekende sońǵy qylmys 2023 jyly tirkelgen. Mal urlyǵymen aınalysqan top aýyldan qoıdy qoldy etken. Qylmyskerler sol jyldyń qyrkúıeginde ustaldy.
— Sońǵy bes jylda Qaratalda alkogolge baılanysty birde-bir quqyq buzýshylyq tirkelmegen. Aýyldyń ýchaskelik polıtsııa ınspektory eldi mekenge tek profılaktıkalyq jumyspen ǵana barady, — deıdi polıtsııa podpolkovnıgi Rýslan Muhambetjanov.
Buǵan deıin Qostanaı oblysynda bir aýyldyń turǵyndary ishimdikten bas tartqanyn jazǵan edik.