SQO-da shyrshalardy brakonerlerden qorǵaý úshin kúzet kúsheıtildi
PETROPAVL. KAZINFORM — Soltústik Qazaqstan oblysynda jańa jyl qarsańynda qylqan japyraqty aǵashtardy kesýge jol bermeý úshin statsıonarlyq beketter quryldy.
SQO orman sharýashylyǵy jáne janýarlar dúnıesi aýmaqtyq ınspektsııasynyń málimetinshe, jeltoqsannyń birinen bastap oblys aýmaǵynda 109 mobıldi top quryldy. Onyń quramyna memlekettik orman kúzeti qyzmetkerleri kirgen. Sondaı-aq 15 statsıonarlyq beket ýaqytsha jumys istep jatyr.
Mamandardyń aıtýynsha, bir túp qylqan japyraqty aǵashty, ıaǵnı qaraǵaı nemese shyrshany kesip, zaqymdaǵandardan 15 AEK mólsherinde — 59 myń teńge shamasynda zalal óndiriledi.
Budan bólek, aǵashty kesken jerine baılanysty quqyq buzýshyǵa salynatyn aıyppul mólsheri 50 AEK-ten -196 000 teńgeden 1500 AEK-ke deıin — 6 mln teńge deıin ákimshilik aıyppul salynady. Sondaı-aq, brakonerlerden zańsyz kesilgen aǵashtar, kólik quraldary jáne quqyq buzýshylyq jasaýǵa paıdalanylǵan ózge de zattary tárkilenedi.
Al, eger zańsyz kesilgen aǵashtan memleketke keltirilgen zalal 50 AEK mólsherinen asatyn bolsa, materıaldar Qazaqstan Respýblıkasynyń Qylmystyq kodeksiniń 340-baby boıynsha qylmystyq is qozǵaý úshin quqyq qorǵaý organdaryna joldanady.
Qylqan japyraqty aǵashtardy qorǵaýǵa quqyq qorǵaý organdary da at salysady. Inspektsııa tártip saqshylarymen birlesip oblys aýmaǵynda osy maqsatta reıdtik baqylaý sharalaryn júzege asyrmaq.
Buǵan deıin Almaty oblysynda bir aıda brakonerlikke qatysty 11 qylmystyq is qozǵalǵanyn jazǵan edik.