SQO-da shyrshalardy brakonerlerden qorǵaý úshin 11 statsıonarlyq beket quryldy

PETROPAVL. KAZINFORM – Soltústik Qazaqstan oblysynda Jańa jyl meıramy qarsańynda ormanshylar kúsheıtilgen tártipte jumysqa kiristi. Qaraǵaı-shyrshany zańsyz kesýden qorǵaý úshin óńirde 11 statsıonarlyq beket jáne 100-ge jýyq mobıldi top quryldy.

SQO tabıǵı resýrstar jáne tabıǵat paıdalanýdy retteý basqarmasynyń málimetinshe, jeltoqsan - dástúrli túrde orman sharýashylyǵy qyzmetkerleri úshin eń qıyn jáne jaýapty aılardyń biri.

Jańa jyldyq merekeniń kórki – shyrsha, sol sebepti jasyl jelekke meıram jaqyndaǵan saıyn suranys artady. Brakonerlikke jol bermeý úshin arnaıy is-sharalar jospary bekitilgen, patrýldeý marshrýty anyqtalyp, keste jasaldy.

- Azamattar men zańdy tulǵalardyń qylqan japyraqty aǵashtardy zańdy túrde satyp alýyna tekserý júrgiziletin bolady. Qaraǵaı-shyrshany zańsyz keskenderge qylmystyq jaýapkershilik bar. Memlekettik orman qory aýmaǵynda 1 qylqan japyraqty aǵashty joıǵany nemese búldirgeni úshin jaýapkershilik sharalary qatańdatyldy, zańbuzýshy kem degende 15 AEK - 55 380 teńge mólsherinde zalaldy óteıdi. Al keltirilgen shyǵyn mólsheri kóp bolǵan jaǵdaıda QR Qylmystyq kodeksiniń 340-babyna sáıkes quqyq buzýshyǵa qatysty qylmystyq jaýaptylyq týyndaıdy, sondaı-aq 100 AEK nemese 369 200 teńge mólsherinde aıyppul tóleıdi, - deıdi basqarmanyń statıstıgi Sáýle Súleımenova.

Búginde naryqta úıdi bezendirýge arnalǵan jasandy shyrshanyń túr-túri bar. Sondaı-aq, mamannyń aıtýynsha, Reseıden jáne basqa shekaralas memleketterden ımporttalatyn shyrshalardy zańdy túrde satyp alýǵa bolady. Qylqan japyraqty aǵashtar satylǵan jaǵdaıda satýshynyń ózimen birge tıisti qujattary bolýy qajet.

Buǵan deıin SQO-da belsendi demalý úshin qaı jerde shańǵy-konkı tebýge bolatynyn jazǵan edik.