SQO-da sheteldikti zańsyz jumysqa alǵan 10 adam jazalandy
PETROPAVL. QazAqparat – Soltústik Qazaqstan oblysynda respýblıkalyq «Zańsyz kelýshi» jedel-profılaktıkalyq is-sharasynyń 4 kúni ishinde sheteldik jumys kúshin zańsyz tartqany úshin 10 jumys berýshi jaýapqa tartyldy, dep habarlaıdy QazAqparat tilshisi.
SQO polıtsııa departamenti baspasóz qyzmetiniń málimetinshe, 10 qazannan bastap óńir polıtseıleri jaldamaly páterlerdi, qurylys alańdaryn, bazarlardy, fermerlik jáne sharýa qojalyqtaryn, sheteldikterdiń júrýi múmkin basqa da oryndardy kúsheıtilgen rejımde tekserip jatyr. Bul jumys respýblıkalyq «Zańsyz kelýshi» jedel-profılaktıkalyq is-sharasynyń 2 kezeńi aıasynda júrgizilip jatyr.
Tártip saqshylarynyń aıtýynsha, qazaqstandyqtar olarǵa sheteldik azamattardyń kelgeni jóninde kóshi-qon qyzmetin úsh kúnniń ishinde habardar etýi kerek. Alaıda bul zań talaby jıi buzylady. Jedel-profılaktıkalyq is-sharanyń 4 kúninde osyndaı 77 derek anyqtaldy.
Sondaı-aq, sheteldik jumys kúshin zańsyz tartqany úshin 10 jumys berýshi jaýapqa tartyldy. Máselen, Shal aqyn aýdanynyń turǵyny Qazaqstanǵa kelip jumysqa ornalasýǵa ruqsat almaǵan Ózbekstan azamatyn úıine jumysshy retinde qabyldaǵan.
«Kóshi-qon zańnamasyn buzǵany úshin 92 sheteldik jaýapqa tartyldy. Olardyń ishinde alys shetelden kelgen Túrkııa azamaty da bar, ol Qazaqstanda vızasyz júrý merzimin buzǵan, ıaǵnı 30 kúndik merzimi ótip ketken. Budan bólek, jedel-profılaktıkalyq is-shara barysynda sot sheshimimen QR zańnamasyn buzǵany úshin elden 7 sheteldik azamat shyǵaryldy. Olardyń basym bóligi – elde bolý merzimin buzǵan», - deıdi kóshi-qon qyzmeti basqarmasynyń bastyǵy Talǵat Ábilov.
