SQO-da sheteldik nómirli 60 avtokólik arnaıy turaqtarǵa qoıyldy

PETROPAVL. QazAqparat – Soltústik Qazaqstan oblysynda tek sońǵy eki jylda aıyp turaǵyna ózge elderdiń nómirleri bar 60 avtomobıl qoıyldy, dep habarlaıdy QazAqparat tilshisi.

SQO polıtsııa departamenti baspasóz qyzmetiniń málimetinshe, aıyp turaǵyna qoıylǵan kólikterdiń jeteýi – Reseıden aıdap áketilgen kólikter tiziminde bolǵan. Keıbir kólikterge shetelde shekteý qoıylǵandyqtan aıyp turaǵynda tur. Mysaly, «BMW X-5» kóliginiń naqty ıesine Reseıde múlik tyıymy salynǵandyqtan, tamyz aıynda Petropavl turǵyny kóliginen aıyryldy jáne mundaı oqıǵalar jıi kezdesip te jatyr.

«Sonymen qatar, aıyp turaǵyna Qazaqstan Respýblıkasynyń memlekettik shekarasynda toqtatylǵan kólikter qoıylady. Bul kólikter zańnamany buza otyryp resimdelgen. Olardyń kóbisin jalǵan qujattarmen kirgizbekshi bolǵan, keıbireýiniń vin-kody qaıta soǵylǵan. Jerlesterimizdiń birazy shetelde «uqsasy» bar kólikti tizgindep júr deýge negiz bar», - deıdi SQO PD anyqtaý basqarmasy bastyǵynyń orynbasary Jeńis Temirbekov.

Kelesi bir qaýip qazaqstandyqtar «konstrýktor» dep atap ketken kólikterge qatysty. Kúrdeli jol-kólik oqıǵasynan keıin avtomashınalardyń qosalqy bólshekterinen kólik qurastyrylyp, satylady. Olardy da jalǵan qujattar boıynsha satady. Polıtseıler shetel kóligin satyp alar kezde avtomobılderdiń jáne agregattardyń (vin-kod, shanaq, qozǵaltqysh, shassı jáne t.b.) sáıkestendirý nómirlerin tirkeý qujattarynda kórsetilgen málimettermen salystyrýǵa, shekteýler qoıylǵanyn, ne qoıylmaǵanyn, jalpy tarıhyn tekserýge keńes beredi.

Jalpy SQO-da tek ońǵy eki jylda sheteldik nómirleri bar 60 avtokólik aıyp turaqtaryna qoıyldy.