SQO-da shetelden ákelingen kólikti zańdastyrý qarqyny báseńdedi
SQO polıtsııa departamenti protsessıngtik ortalyǵynyń aǵa memlekettik avtonspektory Qaırat Seıitqulovtyń aıtýynsha, búginge deıin óńirde 1187 avtokólik zańdastyrýdan ótti.
Qazirgi ýaqytta Petropavldaǵy mamandandyrylǵan halyqqa qyzmet kórsetý ortalyǵynda uzyn-sonar kezek joq.
Buǵan deıin kúnine 80-90 adamdy qabyldasa, qazir orta eseppen mamandardyń aldynan 60-70 adam ótedi eken.
«Oń jaq rýli bar avtokólikterdi tirkeýden ótkizýde másele bar. Ol mashınalardyń tizimin jasap, mınıstrlikke, Ákimshilik polıtsııa komıtetine jiberip jatyrmyz.
Al jalpy jumys bir jolǵa qoıylǵan. Bizge kelmes buryn turǵyndar úılerinde otyryp, elektrondy úkimet nemese mobıldi qosymsha arqyly kóligi zańdastyrýdan óte me, joq pa bile alady. Sondyqtan bizge negizinen barlyq qujattaryn jınap, elektrondy túrde kezek alyp kelip jatyr», - deıdi Qaırat Seıitqulov.
Mamannyń aıtýynsha, zańdastyrýǵa kelgen bir adamnyń qujattaryna qatysty qazir tekserý jumystary júrgizilip jatyr.
«Tehnıkalyq pasporty qoldan jasalýy múmkin degen kúdik paıda boldy. Sondyqtan qazirgi ýaqytta tekseris júrip jatyr. Eger bizdiń kúdigimiz rastalsa, Petropavl turǵyny kóligin zańdastyra almaıdy. Biraq oǵan qatysty eshqandaı jaza qoldanylmaıdy. Óıtkeni onyń zań buzý pıǵyly bolǵan joq, aıtýynsha, kólikti Reseıden satyp alǵan», - deıdi memlekettik avtoınspektor.
Avtokólikterdi zańdastyrý boıynsha ótinishterdiń azaıýyna baılanysty mamandandyrylǵan halyqqa qyzmet kórsetý ortalyqtarynyń jumys kestesi de ózgergen.
«Azamattarǵa arnalǵan úkimet» memlekettik korporatsııasy KEAQ SQO fılıaly baspasóz qyzmetiniń málimetinshe, Petropavldaǵy sheteldik avtokólikterdi zańdastyrý boıynsha memlekettik qyzmet kórsetetin ortalyq azamattardy jumys kúnderi saǵat 9:00-den 18:00-ge deıin, senbi kúni saǵat 9:00-den 14:00-ge deıin qabyldaıdy.Bul jumys kestesi 6 naýryzǵa deıin ózgerissiz qalmaq.
Foto: SQO PD protsessıngtik ortalyǵy
