SQO-da sheneýnikter quny 85 mln teńge bolatyn 5 páterdi zańsyz berip jibergen

Prokýrorlyq tekserý barysynda jer ýchaskelerin jáne jyljymaıtyn múlikti májbúrlep ıelikten shyǵarý rásimderin ótkizý barysynda páterlerdi zańsyz usyný faktileri anyqtaldy, dep habarlaıdy Kazinform Soltústik Qazaqstan oblysynyń prokýratýrasynyń baspasóz qyzmetine silteme jasap.

Petropavl qalasynyń turǵyn úı-kommýnaldyq sharýashylyq bóliminiń laýazymdy tulǵalary «Turǵyn úı qatynastary týraly» Zańnyń talaptaryn buza otyra oblys ortalyǵynyń bir turǵynyna qosymsha qurylystary bar quny 39 mln teńgeni quraıtyn jer ýchaskesin alyp, onyń ornyna jalpy somasy 85 mln teńge bolatyn 5 jaıly páterdi bergen.

Artynan ol páterler úshinshi tulǵalarǵa satylǵan.

Qadaǵalaý organymen sotqa páterlerdi satý-satyp alý mámilelerin jaramsyz dep taný týraly talap aryz berildi.

Sottyń sheshimimen prokýrordyń talaby qanaǵattandyryldy.Búgingi kúni sot aktisi zańdy kúshine endi, zańsyz alynǵan páterlerdi memleket menshigine qaıtarý boıynsha jumys júrgizilýde.

Taǵy bir jaǵdaıda, qala turǵyny Zańnyń 109-babynyń talaptaryn buza otyryp, quny 20,3 mln teńgeniń jaıly páterin jekeshelendirip alǵan, alaıda ózi sol páterde turmaǵan.

Osylaısha memleket múlki turǵyn úı qorynan zańsyz shyǵarylǵan.

Atalǵan fakti boıynsha búgingi kúni Qylmystyq kodekstiń 189-baby «Senip tapsyrylǵan bóten múlikti ıemdenip alý nemese talan-tarajǵa salý» boıynsha sotqa deıingi tergep-tekserý bastaldy, arnaıy prokýrorlar tergeý júrgizip jatyr.

Sonymen birge qalalyq turǵyn úı-kommýnaldyq sharýashylyq bóliminiń laýazymdy tulǵalary páterlerdi usynǵanda jáne turǵyn úı alý kezegin túgendegende júıeli zańbuzýshylyqtarǵa jol bergen.

Prokýrorlyq qadaǵalaý aktisi boıynsha jiberilgen buzýshylyqtardy joıý jáne kináli laýazymdy tulǵalardy jaýapqa tartý boıynsha sharalar qabyldanýda.