SQO-da sheneýnik oryndalmaǵan jumysqa 31 mln teńge tólegeni úshin qyzmetinen bosatyldy

ASTANA. KAZINFORM – Soltústik Qazaqstan oblysynda turǵyn úı-kommýnaldyq sharýashylyq bóliminiń basshysy ornatylmaǵan sý tazartý modýli úshin merdigerge 31,3 mln teńge tólegen. Bul týraly prokýratýranyń baspasóz qyzmeti habarlady. 

Zań buzýdy jergilikti atqarýshy organdardy tekserý kezinde prokýrorlar anyqtaǵan.

— Esil aýdanynyń TÚKSh bóliminiń basshysy memlekettik satyp alý jáne memlekettik qyzmet týraly zańnamany buza otyryp, oryndalǵan jumystar aktisine qol qoıyp, aýyldyq eldi mekenderde keshendi sý tazartý modýlin ornatý úshin jetkizýshige is júzinde oryndalmaǵan jumys úshin 31,3 mln teńge tólegen, — delingen prokýratýra habarlamasynda.

Osyndaı zań buzý oblystyń basqa aýdandarynda da anyqtalǵan. Qyzyljar aýdanynda Beskól aýyldyq okrýginiń ákimi aýdan ortalyǵynyń alańyn Jańa jylǵa bezendirý qyzmetteri úshin jetkizýshige 8,4 mln teńge tólegen, alaıda bul jumys is júzinde oryndalmaǵan.

— Aýyldyq okrýg ákimine tolyq emes qyzmettik sáıkestik týraly eskertý túrinde tártiptik jaza qoldanyldy, al aýdandyq TÚKSh bóliminiń basshysy jumystan bosatyldy, — dep atap ótildi habarlamada.

Aıta ketelik Soltústik Qazaqstan oblysynda 45 aýyl jabylady.