SQO-da sheneýnik bıýdjetten jymqyrǵan aqshasyna dámhana satyp alǵan

PETROPAVL. QazAqparat - SQO ákimdigi qarjy basqarmasy basshysynyń burynǵy orynbasary qylmystyq jolmen alynǵan aqshany zańdastyrdy (jymqyrý) degen kúdikke ilindi. Bul jóninde QR Sybaılas jemqorlyqqa qarsy is-qımyl agenttiginiń baspasóz qyzmetine silteme jasap QazAqparat habarlaıdy.

Soltústik Qazaqstan oblysynyń sybaılas jemqorlyqqa qarsy qyzmeti oblystyq qarjy basqarmasy basshysynyń burynǵy orynbasaryna qatysty tergeýdi bastady. Ol qylmystyq jolmen alynǵan aqshany zańdastyrdy degen kúdikke ilinip otyr.

Ol Petropavl qalasynda bıznes júrgizý úshin 286,5 mln teńge somaǵa jyljymaıtyn múlikti (ákimshilik úı-jaı men irgeles jer ýchaskeleri bar qoǵamdyq tamaqtaný ǵımaratyn) satyp alý arqyly urlanǵan bıýdjet qarajatyn zańdy aınalymǵa engizbek boldy dep aıyptalýda.

Sondaı-aq, buǵan deıin habarlanǵandaı, joǵaryda kórsetilgen jaýapty laýazymdy tulǵanyń 500 mln teńgeden astam bıýdjet qarajatyn bireýlermen birlesip jymqyrdy degen kúdik boıynsha tergeý jalǵasyp jatyr.

Sot atalǵan qylmystyq is boıynsha kúdiktige qatysty aldyn ala «kúzetpen ustaý» túrindegi bultartpaý sharasyn sanktsııalady.

Kúdiktilerge qatysty túpkilikti sheshimdi olardyń kinásiniń deńgeıin anyqtaý arqyly sot qabyldaıdy.