SQO-da sheneýnik bıznespen aınalysty degen kúdikke ilikti
Sheneýnik kásipkerlikpen aınalysty degen kúdikke ilikken. Memlekettik qyzmet isteri jáne sybaılas jemqorlyqqa qarsy is-qımyl departamenti júrgizgen qyzmettik tekseris barysynda onyń jubaıy Marına Bektemirovaǵa tıesili sharýa qojalyǵy bar ekeni anyqtaldy. Departament qyzmetkerleri qojalyqty shynynda Ámir Bektemirovtiń ózi júrgize me, joq pa - sony birneshe adamnan suraǵan. Olardyń ishinde tek bir kombaınshy sheneýniktiń ózi janarmaı ákelip, eki ret ony alqaptan alyp ketkenin aıtty.
Al Bektemirovtiń ózi kombaınshynyń nege bulaı aıtqanyn túsiner emes. Betpe-bet kezdesip muny aıtýǵa da ázir. Sheneýniktiń aıtýynsha, jubaıynyń qyzmetine onyń eshqandaı qatysy joq. Kombaınshyǵa onyń týysy Dmıtrıı Esenıýk barǵan.
«Marına sharýa qojalyǵyn ákesiniń kómegimen 1998 jyly qurǵan. Men ol kezde memlekettik qyzmettemin. Áıelim jumyssyz júrdi, azyn-aýlaq tabys alý úshin osy qojalyqty qurdy. Ony túgel óz atyna resimdegen. Qazir qojalyqta birde-bir tehnıka joq, Marına tehnıkasyn paıdalaný úshin basqa qojalyqtarmen kelisedi. Men 20 jyldan beri memlekettik qyzmette júrmin, sondyqtan kásipkerlikpen aınalysa almaıtynymdy bilemin. Áıelimniń astynda kólik bar, ony ózi júrgizedi, keıde týysymyz Dmıtrıı Esenıýk minedi. Ol áıelime kómektesedi», - deıdi Á. Bektemirov.
Bektemirovtiń aıtýynsha, áıeli sharýa qojalyǵyn basqaǵa tapsyrýǵa da daıyn kórinedi. Áıteýir, osyndaı kıkiljińnen aýlaq júrse bolǵany.
«Materıaldardy tekserý barysynda Bektemirovtiń kásipkerlik qyzmetpen aınalysqanyn rastaıtyn faktiler jetkiliksiz boldy. Degenmen, biz osy máseleni Ádep keńesinde qaraýǵa mindetti edik», - deıdi Ádep keńesiniń tóraıymy, memlekettik qyzmet isteri jáne sybaılas jemqorlyqqa qarsy is-qımyl departamentiniń basshysy Elena Stepanenko.
Ádep keńesiniń músheleri Bektemirovke qatysty tártiptik isti toqtatýdy qoldap daýys berdi.
Avtor: Olesıa Jýkoven
