SQO-da shekarany zańsyz kesip ótpek bolǵan eki marokkalyq ustaldy
PETROPAVL. KAZINFORM – Marokko Koroldiginiń eki azamaty Soltústik Qazaqstan oblysy arqyly zańsyz Reseıge jumysqa ornalasý úshin ótpek bolǵan.
SQO Polıtsııa departamentiniń málimetinshe, eki jigit birneshe kún boıy jaıaý júrip, jolda kezdesken adamnan shekarany qaı jerden kesip ótken yńǵaıly ekenin suraǵan. Arab tilinde sóılesken olar uıaly telefondaǵy aýdarmashy arqyly túsinisken. Aýyl turǵyny birden kóshi-qon qyzmetine habarlaǵan.
Polıtseıler jáne shekara qyzmetiniń áskerı qyzmetshileri sheteldikterdi ustap, mán-jaıdy anyqtady. Tekserý barysynda olardyń Qazaqstan zańyn buǵan deıin de buzǵany anyqtaldy. Qyrkúıek aıynyń ortasynda Shyǵys Qazaqstan oblysynyń Shemonaıha aýdandyq sotynyń sheshimimen memlekettik shekarany buzǵany úshin elden shyǵarylǵan. Olarǵa elden óz erkimen ketý mindettelgen, alaıda bul talap oryndalmaǵan. Bul joly polıtseıler quqyq buzýshylardy oblys ortalyǵyna jetkizip, olardy kúshtep elden shyǵaryp jiberdi.
Jalpy «Nelegal» jedel-profılaktıkalyq is-sharasynyń úsh kúninde SQO-da kóshi-qon zańnamasyn buzýdyń 200-ge jýyq deregi anyqtaldy. Onyń ishinde 120 sheteldik Qazaqstanda bolý erejelerin buzǵany úshin ákimshilik jaýapkershilikke tartyldy, al 9 adam sheteldik jumys kúshin zańsyz paıdalanǵan.
Polıtseıler bazarlardy, qurylys nysandaryn, qosalqy sharýashylyqtardy jáne shetel azamattary bolýy múmkin basqa da oryndardy tekserip jatyr.
Buǵan deıin Abaı oblysynda kóshi-qon tártibin buzǵan 137 sheteldik elden shyǵarylǵanyn jazǵan edik.