SQO-da sheber múıiz ben súıekterden tańǵajaıyp músinder jasaıdy

Sheber kúnde biz qoqysqa tastaıtyn zattardyń ózi paıdaǵa asatynyn aıtady.

«Biz ulan-ǵaıyr dalada ómir súremiz. Tabıǵat-Ananyń qudiretine qaıran qalmasqa laj joq. Sý asty áleminde nebir tańǵajaıyp janýarlar mekendeıdi. Sonyń bárin kórsetkim keledi. Qazaqtar ejelden tabıǵat materıaldaryn sheber qoldanǵan. Máselen, túımeni múıizderden jasaǵan, terini paıdalanǵan. Qozy nemese ógizdiń terisinen qamshy órgen. Búgingi ómirimizde osynyń bárin qoqysqa laqtyramyz, eger olardy tıimdi paıdalansa, táýir buıymdar jasaýǵa bolady», - deıdi M. Andaǵulov.

Sheber tek múıiz ben súıekterdi ǵana qoldanýmen shektelmeıdi. Biraq teńiz janýarlarynyń kollektsııasynda negizinen osy materıaldar paıdalanylǵan. Jaıyndy qoshqardyń múıizinen jasaǵan. Onyń ústine syzylǵan sýrettiń tabıǵılyǵy sonshalyq, ustaǵan qolǵa balyqtyń qabyrshaǵy bilinetindeı.

«Men qonaqqa barǵan úıdiń ıeleri ıtke eshteńe qalmaıtyn boldy, súıektiń bárin Marat alyp ketedi dep kúlisedi. Kim qaıda barsa da, maǵan jumys isterlik materıal ala keledi», - deıdi sheber.

Bir músindi jasaýǵa birneshe aı ketedi. Keıde qajetti materıal tabylmaı qoıady. M. Andaǵulov qazir kez kelgen materıaldy satyp alýǵa bolatynyn aıtady. Biraq onyń bári de sáıkes kele bermeıdi. Úndestik bolýy qajet.

M. Andaǵulov pedagogtik qyzmetke 40 jyl ǵumyryn berdi. Qazir balalardy sheberlikke baýlyp otyr. Oqýshylary jattyǵýǵa qyzyǵa qatysyp, keıde buıymdardyń nusqalaryn ózderi usynady.

«Qolǵa túskenniń bári buıym jasaýǵa jumsalady. Balalardyń ózderi de sabaqqa birer materıal kóterip keledi. Barlyǵyn da óz qolymyzben, stanoktarda jasaımyz. Shákirtterimniń keıbiri dızaıner boldy», - deıdi ustaz.

Sheberdiń aıtýynsha, keıde kórmege qoıylǵan buıymdaryn balalar saǵattap tamashalap turady eken.

«Tabıǵat bizge bárin bergen. Tek, buzbaı, qoldan kelgenin jasaý kerek», - deıdi M. Andaǵulov.