SQO-da shatyryn qardan tazartpaq bolǵan zeınetker tósekke tańyldy
PETROPAVL. KAZINFORM — Soltústik Qazaqstan oblysynda 67 jastaǵy er adam úıiniń shatyryn qardan tazartpaq bolyp aýyr jaraqat aldy.
Petropavldaǵy kópbeıindi qalalyq jedel medıtsınalyq járdem aýrýhanasynyń málimetinshe, er adam 2 metrlik bıiktikten qulaǵan. Ol dárigerlerge eki aıaǵynyń aýyryp, isip ketkenine shaǵymdanǵan.
Syrqatty travmatolog, hırýrg pen terapevt qarap-tekserdi. Onyń ishki aǵzalaryna zaqym kelmegenimen, eki ókshe súıeginiń jabyq synǵany anyqtaldy. Er adamǵa ota jasaldy.
Dárigerlerdiń aıtýynsha, bul aýyr jaraqattardyń qataryna jatady, óıtkeni uzaq emdelip, ásirese egde jasta aılap qalypqa kelýdi qajet etedi.
Jalpy ótken demalys kúnderi aýrýhana dárigerleri úshin tynyshsyz ótti. 20-25 naýryz aralyǵynda emdeý mekemesine 333 adam jetkizilip, olardyń 11-i jaraqat bólimine jatqyzyldy.
— Kómekke júgingenderdiń 54-i ǵana aýyldardan kelgen, qalǵandary qala turǵyndary. Syrqattardyń 200-ge jýyǵy turmystyq, 140-y kóshe jaraqatymen tústi. 2 adam óndiristik jáne altaýy sporttyq jaraqat alǵan. Al jaraqat túrlerine kelsek, 139 adam qatty soǵylýmen kelgen. Sondaı-aq súıegi synǵan 90 turǵynǵa kómek kórsetildi. Budan bólek, 15 adamdy janýarlar tistegen, 7 adam kúıik alyp, bir úsik shalý deregi de tirkeldi, — deıdi aýrýhana mamandary.
Buǵan deıin Aqtóbede temirjolshy jumys ornynda jaraqat alyp, tósekke tańylyp qalǵanyn jazǵan edik.
