SQO-da Shat ózeni tasyp, 22 adamdy kóshirýge týra keldi
PETROPAVL. KAZINFORM – Soltústik Qazaqstan oblysy Aqjar aýdanynda arnaıy qyzmetter túni boıy jumys istep, Talshyq aýylyndaǵy úılerdi sý basýyna jol bermedi.
SQO tótenshe jaǵdaılar departamenti baspasóz qyzmetiniń málimetinshe, 29 naýryz kúni túnde Aqjar aýdanyndaǵy Shat ózeniniń sý deńgeıi kúrt kóterilip, Talshyq aýylynyń shetinde ornalasqan úılerdi sý basy qaýpi týdy.
Jergilikti qutqarýshylar, polıtsııa qyzmetkerleri men ákimshilik ókilderi birlese is-áreket etip, aýyldaǵy 6 úıden 22 turǵyndy, sonyń ishinde 5 balany evakýatsııalady.
Turǵyndardyń bir bóligi aýyldaǵy mektep-ınternatta ornalasqan evakopýnktke jetkizilse, keıbiri týystaryna ketti. Sý basý qaýpi bar aımaqtan 21 bas mal da shyǵaryldy.
Oqıǵa ornynda 20 adam, 10 tehnıka jumys istedi.
Túni boıy atqarylǵan ınjenerlik jumystyń nátıjesinde muz qursaýy alynyp, sýdyń joly ashyldy.
Eldi mekendi sý basý qaýpi joıyldy. Tańerteń turǵyndar aman-esen úılerine oraldy.
Eshqaısysyna medıtsınalyq kómektiń qajeti bolmady.
Jaǵdaı mamandardyń baqylaýynda.
