SQO-da sharýashylyqtyń janarmaı quıylǵan eki kóligi janyp ketti
PETROPAVL. QazAqparat – Soltústik Qazaqstan oblysyndaǵy sharýashylyqtardyń birinde búgin janarmaı quıylǵan avtotsısterna órtenip, qatty jeldiń saldarynan qasyndaǵy júk kóligi de janyp ketti, dep habarlaıdy QazAqparat tilshisi.
SQO Tótenshe jaǵdaılar departamenti baspasóz qyzmetiniń habarlaýynsha, órt Maǵjan Jumabaev aýdany Qaraqoǵa aýyly mańyndaǵy «Jıgalova Karagýgınskoe» sharýa qojalynyń aýmaǵyndaǵy janarmaı bazasynda shyqqan. Órt sóndirý qyzmetine shaqyrtý kúndizgi 14.51 mınýt ketkende tústi.
Oqıǵa ornyna Býlaev jáne Petropavl qalalarynyń órt sóndirýshileri: barlyǵy 19 maman men 4 tehnıka jumyldyryldy. Óıtkeni olardyń jumysyn qatty jel qıyndatyp jibergen edi.
Mamandardyń aıtýynsha, jalyn sharýashylyqtyń janarmaı bazasynda KAMAZ avtotsısternasynan dızel otynyn aǵyzý kezinde shyqqan. Qatty jel órtti órshitip, qasynda turǵan GAZ – 53 kóligin sharpyǵan. Saldarynan eki mashına da janyp ketti.
Órt sóndirý bólimderiniń mamandary qyzyl jalynmen shamamen 2,5 saǵattaı alysyp, saǵat 17.39 mınýtta sóndirdi. Janarmaı saqtalǵan ydystarǵa taralýyna jol bergen joq.
Baspasóz qyzmetiniń málimetinshe, adamdar din aman. Ázirshe órttiń shyǵý sebebi jáne kelgen shyǵyn mólsheri belgisiz.
