SQO-da sharýashylyq jumysshylaryna kúzgi oraqtyń eńbekaqysyn bermegen
PETROPAVL. QazAqparat – Soltústik Qazaqstan oblysyndaǵy Aqtúıesaı aýylynyń turǵyndary toǵyz aıdan beri eńbekaqylaryn ala almaı júr, dep habarlaıdy QazAqparat tilshisi.
SQO Ýálıhanov aýdany Aqtúıesaı aýylynyń turǵyndary «Qyzyltý Astyq» JShS 2019 jylǵy oraqta mańdaı termen tapqan eńbekaqylaryn ala almaı júr. Eldi meken turǵyny Vıktorııa Krahmalevanyń kúıeýi osy sharýashylyqta mehanızator bolyp eńbek etken. Jumysshynyń alashaǵy - 530 myń teńge.
«Meniń kúıeýim aqshasyn ala almaı jumystan shyǵyp ketti. Qańtarda, keıin aqpanda beremiz dep, osylaısha aı saıyn bizdi qur sózben shyǵaryp salady. Sońǵy ret 1 mamyrǵa deıin mindetti túrde beremiz dep ýáde etti. Ol da bos sóz bolyp shyqty. Qujattardy jınap, aryzdandyq. Nátıje joq», - deıdi Vıktorııa Krahmaleva.
Vıktorııanyń úsh balasy bar, úlken qyzy epılepsııamen aýyrady. Jarty jylda bir ret aýrýhanaǵa aparyp teksertýi qajet. Kelinshektiń aıtýynsha, qarajattyń joqtyǵynan olar eshqaıda shyǵa almaı otyr.
«Kúıeýim ol sharýashylyqta 13 jyl eńbek etti. Eńbekaqyny buryn da keshiktirgen kezderi boldy. Biraq kóp uzatpaı tóleıtin. Kúte-kúte sharshadyq», - deıdi eldi meken turǵyny.
SQO Memlekettik eńbek ınspektsııasy basqarmasynyń málimetinshe, «Qyzyltý Astyq» JShS 70 adamǵa 29,8 mln teńge qaryz. Jumysshylardan byltyr aryz túsisimen eńbek ınspektorlary tekseris júrgizip, qaryzdy joıý úshin kásipkerge uıǵarym bergen. Alaıda JShS ol mindetti oryndamaǵan.
«Ulttyq ekonomıka mınıstrliginiń málimetinshe, «Qyzyltý Astyq» JShS mıkrokásipkerlik sýbektisi bolyp esepteledi. Al elimizde 1 qańtardan bastap shaǵyn kásipkerlik nysandaryn tekserýge moratorıı jarııalanǵan. Sol sebepti biz bul sharýashylyqty ekinshi qaıtara teksere almaımyz. Turǵyndarǵa bul máseleni sot arqyly sheshýge keńes beremiz», - deıdi SQO Memlekettik eńbek ınspektsııasy basqarmasynyń basshysy Qaırat Pishenbaev.
