SQO-da sharýashylyq tehnıkasy magıstraldy elektr jelisin zaqymdap, 60 mln teńge shyǵyn keltirdi
PETROPAVL. KAZINFORM - Soltústik Qazaqstan oblysynda 110 kV kerneýli áýelik elektr jelisi tolyǵymen qalpyna keltirildi.
«SEVKAZENERGO» kompanııasynyń málimetinshe, oqıǵa bir apta buryn bolǵan. Sharýashylyqtardyń biri tehnıkamen topyraqty óńdeý barysynda joǵary voltty «Petropavl JEO-2 – Býlaevo – Neft» magıstraldy áýelik elektr jetkizý jelisiniń tiregin soqqan. Saldarynan apattyq jaǵdaı týyndap, jeli úzilgen.
- Bul - strategııalyq mańyzǵa ıe jeli. Maǵjan Jumabaev aýdanyn jáne Ońtústik Oral temirjolynyń qosalqy stantsııalaryn elektr energııasymen qamtamasyz etedi. Soltústik Qazaqstan Elektrjeli taratý kompanııasy apattyń saldaryn tolyq joıdy. Qalpyna keltirý barysynda zaqymdanǵan tirek tolyq buzylyp, onyń ornyna eki jańa temirbeton tiregi ornatyldy. Sonymen qatar, symdardy tartý jáne montaj jumystary júrgizilip, jeliniń jumysy tolyq qalpyna keltirildi, - deıdi «Soltústik Qazaqstan Elektrjeli taratý kompanııasy» AQ bas dırektory Aleksandr Chekýlaev.
Mamandardyń aıtýynsha, aldyn ala baǵalaý boıynsha kompanııaǵa 60 mln teńge shamasynda materıaldyq shyǵyn keldi.
- Jóndeý jumystary kezinde tutynýshylar elektr qýatynan ajyratylǵan joq. Jelini qalpyna keltirý barysynda Reseıdiń jáne «Kókshetaý Energo» JShS energııa júıelerin qoldaný arqyly turǵyndarǵa elektr qýaty úzilissiz berildi, - deıdi Aleksandr Chekýlaev.
Buǵan deıin ShQO-da elektr jelisiniń shamadan tys júktelýi saldarynan 150 ret órt shyqqanyn jazǵan edik.
