SQO-da shartty túrde sottalǵandarǵa elektrondy bilezik taǵylyp jatyr
PETROPAVL. QazAqparat – Soltústik Qazaqstan oblysynda jazasyn shartty túrde óteıtinderge jáne bas bostandyǵy shektelgenderge elektrondy bilezikter taǵyla bastady. Probatsııa qyzmeti talapty oryndamaıtyn sottalǵandardy osylaısha baqylaýǵa almaq, dep habarlaıdy QazAqparat tilshisi.
SQO probatsııa qyzmeti mamandarynyń aıtýynsha, elektrondy baıqaý quraly eń aldymen jaza óteý sharttaryn únemi buzatyndarǵa qoldanylmaq.
Elektrondy bilezikti taǵýǵa májbúr bolǵandardyń biri – Vladıslav. Jigit urlyq jasaǵany úshin 3 jylǵa shartty túrde bas bostandyǵynan aıyrylǵan. Sonyń eki jylǵa jýyǵyn ótedi. Qalǵan bir jylǵa elektrondy braslet onyń «serigine» aınalmaq. Probatsııa qyzmetiniń mamandary talapty jıi buzǵan onyń aıaǵyna bilezikti salyp berdi.
«Keshki saǵat 19.00-den keıin kóshege shyǵýǵa ruqsat joq. Men ony eskermeı dostarymmen kezdesýge bardym. Endi júrgen-turǵanym arnaıy qural arqyly baqylanatyn bolady. Men bul jańashyldyqqa qarsy emespin. Sebebi temir tordyń ar jaǵynda otyrǵannan góri bostandyqta braslet kıip júrgen anaǵurlym jaqsy», - deıdi jazasyn óteýshi Vladıslav.
Jyl basynan SQO boıynsha 1100 sottalǵan probatsııa qyzmetine esepke alyndy, olardy 70 qyzmetker baqylaıdy. Óńirge 144 elektrondy baıqaý quraly bólindi. Bul brasletter jaza óteý sharttaryn únemi buzatyndarǵa 2 aıdan bir jylǵa deıin taǵylmaq. Eger elektrondy baıqaý quraly da toqtaý sala almasa, shartty jaza naqty bas bostandyǵynan aıyrýǵa aýystyrylmaq.
«Bileziktiń belbeýi ońaılyqpen kesilmeıdi, onyń ishinde temir symy bar. Qural jeńil, allergııa týdyrmaıdy. Sý ótpeıdi. Qýaty 2-5 kúnge deıin jetedi. Keıin sottalǵan quraldy únemi qýattandyryp otyrýǵa mindetti. Bilezikti taqqannan keıin ol jaıynda aqparat planshette paıda bolady. Qaıda barǵanyn, júrgenin bárin GPRS arqyly kórip otyramyz. Eger ol belgili bir ruqsat etilgen aýmaqtan shyǵatyn bolsa, ony ınspektor birden kóredi», - deıdi SQO boıynsha Qylmystyq-atqarý júıesi departamenti probatsııa qyzmetiniń bólim basshysy Dáýren Sádýaqasov.
Búginde Petropavlda 295 sottalýshy probatsııa qyzmetinde esepte tur. Onyń 30-y talapty jıi buzatyndar qatarynda. Al arnaıy qural 200 myń teńge shamasynda turady. Eger sottalýshylar ony zaqymdaıtyn bolsa, shyǵyndy qaltasynan ótemek.
