SQO-da shańdy daýyl 5 ǵımarattyń shatyryn julyp ketti
PETROPAVL. QazAqparat – Soltústik Qazaqstan oblysynda 18 mamyr kúni bolǵan shańdy daýyl 5 aýyldaǵy ǵımarattyń shatyryn julyp ketti, dep habarlaıdy QazAqparat tilshisi.
SQO tótenshe jaǵdaılar departamenti baspasóz qyzmetiniń málimetinshe, 18 mamyr, saǵat 13:20 kezinde Taıynsha aýdanynda ekpini sekýndyna 33 metrge deıin jetetin shańdy daýyl turdy. Sonyń saldarynan Chermoshnıanka aýylyndaǵy Chermoshnıanskıı aýyldyq okrýgi ákimdigi ǵımaratynyń 80 sharshy metr shatyryn julyp ketti. Osy aýdandaǵy Leonıdovka eldi mekenindegi orta mektepke de zaqym keldi. Jalpy aýmaǵy 3,5 myń sharshy metr bolatyn mekteptiń 171 sharshy metriniń shatyry julyndy.
Shańdy daýyl Aqjar aýdanynda saǵat 14.50 kezinde ótti. Munda da jeldiń ekpini sekýndyna 33 metrge jetken. Talshyq aýylyndaǵy Besterek orta mektebi shatyrynyń bir bóligi, Alqaterek eldi mekenindegi orta mektep ǵımaraty sport zalynyń shatyry jáne Voshod aýylyndaǵy orta mektep sport zalynyń shatyry julyndy.
Mamandardyń aıtýynsha, zardap shekkender men qaza tapqandar joq. Oqıǵa ornynda komıssııa jumys istep jatyr.
Esterińizge salaıyq, keshe SQO-nyń úsh aýdanynda shańdy daýyl soqqan edi. Sırek kezdesetin qubylys turǵyndardy shoshytty.
