SQO-da shamamen ár úshinshi mektep oqýshysynda kóz aýrýy bar
PETROPAVL. QazAqparat - Soltústikqazaqstandyq oqýshylar arasynda kóz aýrýlary birinshi orynda tursa, ekinshi kezekte júıke-psıhıkalyq jáne omyrtqa jotasynyń qısaıýy kóptep kezdesedi, dep habarlaıdy QazAqparat tilshisi.
SQO ákimdiginiń otyrysynda óńirdiń sanıtarlyq epıdemıologııalyq jaǵdaıy týrasynda aıtqan mamandar oqýshylardyń densaýlyǵyna kóńil aýdartty. 2018 jyldyń qorytyndysy boıynsha qaralǵan ár myń balanyń 36,6 %-ynda kórý patologııasy bar. 13,8%-ben júıke-psıhıkalyq aýrýlar tirkelse, balalardyń 12,9%-ynda omyrtqa jotasynyń qısaıýy, 8,2%-ynda asqazan-ishek joly aýrýlary kezdesedi.
SQO Qoǵamdyq densaýlyq saqtaý departamentiniń bastyǵy Serikbaı Qasmaqasovtyń aıtýynsha, oqýshylardyń densaýlyǵy olarǵa jasalǵan jaǵdaımen tyǵyz baılanysty. Keı mektepterde káriz júıesi, sý máseleleri sheshilmegen, oqýshylardyń jasy men boıyna sáıkes keletin jıhazben tolyq qamtylmaǵan. Oblystaǵy 244 mektep qana (50,8%) ortalyqtandyrylǵan sý júıesine qosylǵan, 27-sinde (5,6%) mekteptiń óz sý kózi bolsa, 209 bilim ordasyna (43,5%) sý tasyp jetkiziledi.
Oblysta barlyǵy 480 mektep bolsa, sonyń 84-inde (17,5%) dárethana dalada ornalasqan.
«Sport zaldary M.Jumabaev aýdanynyń 6 mektebinde, Taıynsha aýdanynyń 8 mektebinde joq. Budan basqa sport quraldary kópten beri jańalanbaǵan. Qazirgi tańda sport zaldary 94,5%-ǵa ǵana tolyqtaı jaraqtandyrylǵan», - deıdi Serikbaı Qasmaqasov.
