SQO-da shamamen ár úshinshi dáriger KVI-men kúreske jumyldyrylǵan
PETROPAVL. QazAqparat – Soltústik Qazaqstan oblysy densaýlyq saqtaý basqarmasynyń basshysy brıfıngte óńirdegi koronavırýs ınfektsııasy boıynsha ahýaldy baıandady, dep habarlaıdy QazAqparat tilshisi.
SQO densaýlyq saqtaý basqarmasynyń basshysy Qabdyrahman Saqtaǵanovtyń aıtýynsha, óńir qarasha aıynda KVI boıynsha ekinshi tolqynnan ótti. Qazir oblysta 98 mobıldi brıgada bar. Olar qyrkúıek pen qarasha aılarynda 21 569 shaqyrtýǵa barǵan, ıaǵnı bir táýlikte 150-500 aralyǵynda qyzmet kórsetken.
«Qazir emdeý mekemelerinde 1165 ınfektsııalyq oryn bar. Vırýs alǵash shilde aıynda órshigende ınfektsııalyq statsıonarlarda 1035-ten 1340 syrqatqa deıin em aldy. Qazir odan úsh ese az naýqastar emdelip jatyr. Budan basqa 280 karantındik oryn bar. Jaǵdaı ýshyqqan jaǵdaıda, bar orynnyń 70 % tolǵan ýaqytta, taǵy 330 oryndy qosymsha ashamyz. Ol da jetpegen jaǵdaıda jatyn oryndardy 2415-ke, tipti 3400-ge deıin jetkizýge múmkindigimiz bar», - deıdi Qabdyrahman Saqtaǵanov.
Qazir oblysta KVI-men kúreske ár úshinshi dáriger – 413 maman jumyldyrylǵan. Budan basqa 1135 orta medıtsınalyq qyzmetker jáne kólik júrgizýshisi, sanıtarlar sııaqty 716 jumysshy tartylǵan.
«KVI-men kúreske jumyldyrylǵan medıtsınalyq mamandar qarasha aıy úshin eńbekaqyǵa qosymsha tólem aldy. 2264 adamǵa 659 mln teńge berildi. Onyń ishinde 1-táýekel tobyna jatatyn 1056 adamǵa 514,3 mln teńge, 2-táýekel tobyna jatatyn 398 adamǵa 59 mln teńge jáne 3-táýekel tobyna jatatyn 810 mamanǵa 85,8 mln teńge tólendi», - deıdi basqarma basshysy.
Jalpy SQO-da naýryz-qarasha aıynda medıtsınalyq qyzmetkerlerge 3 513,9 mln teńge tólem jasalǵan.
