SQO-da shaǵyn ózende sý deńgeıi bir táýlikte jarty metrge deıin kóterildi
PETROPAVL. QazAqparat – Soltústik Qazaqstan oblysynda kúnniń kúrt jylynýynan qar erip, shaǵyn ózenderde sý deńgeıi kóterile bastady, dep habarlaıdy QazAqparat tilshisi.
SQO óńirlik kommýnıkatsııalar qyzmetinde mamandar óńirdegi sý tasqynyna qatysty jaǵdaıǵa toqtaldy. «Qazgıdromet» RMK oblystyq fılıaly dırektorynyń orynbasary Natalıa Levınanyń aıtýynsha, táýlik boıy aýa temperatýrasynyń joǵary bolýy qardyń erýine ákeldi. Qazir oblys aýmaǵynyń shamamen 50 %-dan astamynda ǵana qar jamylǵysy bar.
«Oblystyń ózen-kólderinde muz qabaty buzylyp, sý deńgeıi kóterilip keledi. 5 sáýirde Esil ózeniniń salalarynda sý deńgeıi táýligine 3-ten 28 sm-ge deıin joǵarylady. Oblystyń shaǵyn ózenderinde bul kórsetkish 14 pen 55 sm aralyǵynda. 4 sáýirden bastap Sergeev sý qoımasyna sý tola bastady. Búgin saǵat 8.00-de sý qoımasynyń kólemi 530 mln m3, tolymdylyǵy 76% qurady», - deıdi Natalıa Levına.
Mamannyń aıtýynsha, 6-8 sáýir aralyǵynda SQO-da sýyq atmosferalyq aǵyndary bar tsıklon ótpek. Túnde aýa temperatýrasy – 6 gradýsqa deıin tómendese, kúndiz +7-12 gradýsty kórsetpek. Keıin túnde synap baǵanasy 0 +5-ke deıin kóterilip, kúndiz +10-15 gradýsqa deıin jylynady.
«Birinshi onkúndiktiń sońynda jáne ekinshi onkúndiktiń basynda oblystyń shaǵyn ózenderinde sý tasıdy. Ekinshi onkúndikten bastap aýa temperatýrasy kóterilip, túnde +3-8, kúndiz +15-20 gradýsqa deıin jylynady. Esil ózeninde jáne Sergeev sý qoımasynda sý deńgeıiniń kóterilýi jalǵasady. Úshinshi onkúndikte aýa temperatýrasy túnde +2-6-dan +10-ǵa deıin aýytqıdy. Kúndiz +5-10 jáne +15-20 jyly bolmaq. Aıdyń sońynda Petropavl qalasynan joǵary ornalasqan beketterde sý tasqyny sharyqtaý shegine jetpek. Petropavl mańynda sáýirdiń aıaǵynda jáne mamyr aıynyń basynda sý tasqyny bolady dep boljanǵan», - deıdi fılıal dırektorynyń orynbasary.
SQO-da jerústi sýlarynyń gıdrologııalyq rejımin 19 gıdrologııalyq beket júrgizedi, olardyń ekeýi Sergeev jáne Petropavl sý qoımalarynda, bireýi Torańǵul kólinde, qalǵany Esil ózeninde jáne onyń salalarynda ornalasqan.
