SQO-da Sergeev sý qoımasy úshinshi kún qatarynan tasyp jatyr: Sýdyń bıiktigi 169 sm jetti

PETROPAVL. QazAqparat – Soltústik Qazaqstan oblysyndaǵy Sergeev sý qoımasy úshinshi kúnnen beri tasyp jatyr. Búgin tańerteń erneýinen asqan sýdyń bıiktigi 169 sm jetti , dep habarlaıdy QazAqparat tilshisi.

«Qazgıdromet» RMK SQO fılıalynyń málimetinshe, búgin saǵat 8.00-degi jaǵdaı boıynsha Sergeev sý qoımasynda erneýden asqan sýdyń bıiktigi 169 sm jetti.

Osylaısha bir táýliktiń ishinde 67 sm ózgerdi.

Sergeevka qalasynyń mańynda Esil ózeniniń sýy kóterilip jatyr. Keshegi kórsetkishpen salystyrǵanda 361 sm ózgergen. Ázirge qaýipti deńgeıge jetken joq.

Shal aqyn aýdany Kreşenka eldi mekeniniń mańynda Esil ózeni arnasynan shyǵyp, jaıylyp jatyr.

6 sáýir kúni munda ózen deńgeıi birden 4,5 metrge kóterilip, qaýipti deńgeı 1400 sm-ge jaqyndap qalǵan edi.

Keshegideı emes, ekpini saıabyrsyp, bir táýlikte sýy 42 sm ǵana kóterildi.

Esil aýdany Pokrovka eldi mekeniniń mańynda da Esil ózeni sýynyń deńgeıi kóterilip keledi, bir táýlikte 31 sm ózgergen.

Al Gýsakovka eldi mekeni mańynan ótetin Babyqburlyq ózeni sýynyń deńgeıi kesheden beri 115 sm kóterildi. Keshe birden 295 sm kóterilgen Aqanburlyq ózeniniń sýy qaıta bastady.

Vozvyshenka eldi mekeni mańyndaǵy gıdrologııalyq bekette mamandar sý deńgeıiniń 9 sm-ge kemigenin anyqtady.

Jalpy Petropavlǵa qaraı Esil ózeninde ázirge ózgeris shamaly, -3 +10 sm aralyǵynda.