SQO-da separatısterge qatysty úkim ózgerissiz qaldy
PETROPAVL. KAZINFORM – Soltústik Qazaqstan oblystyq sotynyń apellıatsııalyq ınstantsııasy memleket qaýipsizdigine nuqsan keltirýdi nasıhattaǵany jáne separatıstik áreketke jarııa túrde shaqyrǵan óńirdiń tórt turǵynyna qatysty qylmystyq isti qarady.
Byltyr qarasha aıynyń sońynda Petropavl qalalyq soty separatızmdi nasıhattady dep aıyptalǵan 19 adamnyń tórteýine úkim shyǵardy. Vıacheslav Zýderman 9 jylǵa bas bostandyǵynan aıyryldy. Qalǵan úsheýi – Elena Boldyreva, Mádına Qaparova jáne Olga Berejnova 7 jylǵa sottaldy.
Olar bul úkimmen kelispeı appelıatsııaǵa bergen edi.
SQO sotynyń málimetinshe, apellıatsııalyq ınstantsııa Petropavl qalalyq sotynyń úkimin ózgerissiz qaldyryp, sottalǵandar men olardyń qorǵaýshylarynyń apellıatsııalyq shaǵymyn qanaǵattandyrmady. Apellıatsııalyq qaýlymen sot úkimi zańdy kúshine endi.
Esterińizge salaıyq, 2023 jyldyń 19 naýryzy kúni Petropavldyń 19 turǵyny jergilikti kolledjderdiń biriniń ǵımaratyna jınalyp, Soltústik Qazaqstan oblysy Petropavl qalasy eńbekshileriniń Halyq keńesin qurǵanyn jarııalaǵan. Ony keıinnen Qazaqstan Respýblıkasynan táýelsiz dep Deklaratsııa qabyldaǵan. Budan basqa áleýmettik jelide belsendilik tanytyp, Qazaqstannyń táýelsizdigin joqqa shyǵarýdy maqsat etken jazba jarııalap kelgen.
Uıymdastyrýshylardyń biri Zýderman úıinde 9 mm kalıbrli tapansha patronyn zańsyz saqtaǵan.
