SQO-da segiz aıda janýarlardan 1,2 myń adam zardap shekti

PETROPAVL. KAZINFORM – Soltústik Qazaqstan oblysynda adamda qutyrma aýrýy sońǵy ret osydan jeti jyl buryn tirkelse de, sýyqtyń túsýine baılanysty mamandar qaýipsizdik sharalaryn eske saldy.

SQO sanıtarııalyq-epıdemıologııalyq baqylaý departamenti basshysynyń orynbasary Arman Kúshbasovtyń aıtýynsha, bıylǵy segiz aıda 1189 adam qutyrmaǵa qarsy kómek suraǵan. Bul ótken jyldyń uqsas merzimimen salystyrǵanda 8,2% kóp. Máselen Petropavlda bıyl 59 adam dáriger kómegine júgingen, bul byltyrǵymen salystyrǵanda 10% artyq. 

It qaýyp, tyrnaýdan 754 adam nemese 63%, 353 adam nemese 30% mysyqtardan zardap shekken. Sondaı-aq, 82 adamdy egeýquıryq, tyshqan, tıin tistep alǵan. Olardyń barlyǵyna qutyrmaǵa qarsy vaktsına egildi. 

- Jalpy SQO boıynsha jaǵdaı turaqty. Biraq respýblıka aýmaǵynda bıyl qutyrmamen aýyrý faktileri tirkeldi. Bıyl eki adam osy aýrýdan qaıtys boldy. Bireýinde úıdegi kúshik qapqan, ekinshisinde úı mysyǵy tyrnaǵan. Zardap shekkender ýaqyt ótkizip, tek jaǵdaı ýshyqqanda, 1-1,5 aıdan keıin ǵana dáriger kómegine júgingen. Aldyn alý ekpesi jasalmaǵandyqtan, olardy aman alyp qalý múmkin bolmady, - deıdi Arman Kúshbasov. 

Mamannyń aıtýynsha, aýrý silekeı arqyly qapqanda, tistegende adamǵa juǵady. Vırýs jara arqyly enip, júıke júıesin zaqymdaıdy. Inkýbatsııalyq merzim bir jylǵa deıin sozylýy múmkin. 

- Mysaly ıt qapqan jaǵdaıda jarany 15-20 mınýt boıy aǵyndy sýmen sabyndap jýǵan jón. Budan keıin spırtpen nemese ıodpen jarany óńdeý kerek. Osydan soń mindetti túrde emhanaǵa baryp, qutyrmaǵa qarsy ımmýndaýdan ótý qajet. Vaktsınatsııa tegin júrgiziledi. Bul ekpeniń adam densaýlyǵyna zııany joq. Qazir burynǵydaı ekpeni ishke salmaıdy, vaktsına úsh nemese bes ret salynady. 

Qutyrma – emdelmeıtin aýrý. Adam qatty qınalyp qaıtys bolady. Tek qana vaktsına saldyrý arqyly ǵana onyń aldyn alýǵa bolady, - deıdi Arman Kúshbasov. 

Buǵan deıin Qostanaı oblysynyń Sarykól aýdanynda jeke úı aýlasyndaǵy ıtten qutyrma aýrýy anyqtalǵanyn jazǵan edik.