SQO-da segizinshi «ashyq ákimdik» iske qosyldy
SOLTÚSTІK QAZAQSTAN. QazAqparat – «Qyzyljar – adaldyq alańy» jobasy aıasynda Ýálıhanov aýdanynyń ortalyǵy – Kishkenekól aýylynda kezekti «Ashyq ákimdiktiń» saltanatty túrde ashylýy ótti, dep habarlaıdy QazAqparat.
Atalǵan rásimge aýdan ákimi Medet Ospanov, sonymen qatar oblys ákiminiń jańa orynbasary Ǵanı Nyǵmetov pen Sybaılas jemqorlyqqa qarsy is-qımyl agenttigi departamentiniń basshysy Ernar Baıanǵazın qatysty.
Barlyǵy oblysta 2019 jyldan bastap aýdandar men qalalarda 8 servıstik ákimdik ashyldy, bul 60% quraıdy. Jyl sońyna deıin barlyq aýdan ákimdikteriniń jumysyn «open space» formatyna kóshirý josparlanýda.
«Ortalyq tegin Wi-fi-men jabdyqtalǵan, ózine-ózi qyzmet kórsetý sektory men azamattardy qabyldaý orny bar. Aldaǵy ýaqytta múgedekterge qolaıly jaǵdaı jasap, beınekamera men dybys jazý qurylǵysyn ornatýdy josparlap otyrmyz. Atalǵan ortalyqta 40-tan astam túrli memlekettik qyzmet kórsetiletin bolady», - dedi aýdan ákimi Medet Ospanov.
Ashylý saltanatynan soń qonaqtar ortalyq jumysymen tanysyp, qyzmetkerlermen áńgimelesti.
«Memlekettik organdardyń qyzmetiniń ashyqtyǵy – bizdiń jumysymyzdyń basty basymdyǵy. Biz birneshe jobany iske qostyq. «Ashyq bıýdjet» jumys isteıdi. Memlekettik organdar barlyq qujat aınalymyn elektrondyq formatqa aýystyrýda. Memlekettik qyzmet kórsetýlerdi avtomattandyrý turmystyq sybaılas jemqorlyqty tómendetýge jáne azamattardyń ótinishterine jedel den qoıýǵa múmkindik berýde. Bul baǵyttaǵy jumysty úılestirýde jáne júıeli túrde júzege asyrýda «Qyzyljar – adaldyq alańy» jobalyq keńsesiniń alatyn orny erekshe», - dep atap ótti Ernar Baıanǵazın.
Oblys ákimdiginde atap ótkendeı, qazir halyqpen ózara is-qımylǵa baǵyttalǵan transformatsııa júrip jatyr, bul turmystyq sybaılas jemqorlyqty joıýǵa múmkindik beredi.
