SQO-da saýsaǵynan temir shaıba shyqpaı qalǵan balaǵa qutqarýshylar shaqyryldy
PETROPAVL. QazAqparat – Petropavlda 4 jasar balanyń saýsaǵynan temir shaıba shyqpaı qalyp, qutqarýshylardyń kómegine júginýge týra kelgen, dep habarlaıdy QazAqparat tilshisi.
Soltústik Qazaqstan oblysy Tótenshe jaǵdaılar departamenti baspasóz qyzmetiniń málimetinshe, Petropavlda 4 jasar sábı oınap otyryp, saýsaǵyna saqına retinde metall shaıbany taqqan. Biraq óz betimen qaıta sheshe almaǵan. Úıdegi eresekter jaǵdaı ýshyqpaýy úshin birden qutqarýshylarǵa habarlasqan.
Oqıǵa ornyna «SQO Tótenshe jaǵdaılar departamentiniń órt sóndirý jáne avarııalyq-qutqarý jumystary qyzmeti» MM jedel-qutqarý jasaǵy jetken. Olar metaldy tistegishpen kesip, balanyń saýsaǵyn bosatty.
«Balaqaı qatty úreıge boı aldyrmady. Jylap, qoldy-aıaqqa turmasa jumysymyz qıyndar edi. Sol sebepti balanyń saýsaǵyn bosatýǵa birneshe mınýt ýaqytymyzdy ǵana jumsadyq. Oǵan medıtsınalyq kómektiń qajeti bolmady», - deıdi qutqarý bólimshesiniń jetekshisi Nurbolat Aısın.
Qutqarýshylar ata-analardan balalaryn qaraýsyz qaldyrmaýlaryn suraıdy. Al oqys oqıǵa týyndaǵan jaǵdaıda biryńǵaı qutqarý qyzmetiniń «112» telefon nómirine habarlasýǵa bolady.
