SQO-da saýnalardy jalǵa alyp, jeńgetaılyq uıymdastyrǵan top ustaldy
SQO Polıtsııa departamenti baspasóz qyzmetiniń málimetinshe, óńirde 16-18 maýsym aralyǵynda «STOP trafık» jedel-profılaktıkalyq is-sharasy ótti. Tártip saqshylary kóńil kóterý oryndaryn, saýnalardy, qurylys alańdaryn, sharýashylyqtardy jáne fermerlik qojalyqtardy tekserdi. Maqsat - adam saýdasymen, seksýaldyq jáne adam eńbegin paıdalanýmen baılanysty qylmystardy ashý.
«Jeńgetaılyq faktileri boıynsha QR Qylmystyq kodeksiniń 309-baby boıynsha sotqa deıingi tergeý júrgizilip jatyr. Sondaı-aq, QR QK «Uıymdasqan top, qylmystyq uıym qurý jáne olarǵa basshylyq etý, sol sııaqty olarǵa qatysý» 262-babynyń eki bóligi boıynsha faktiler Sotqa deıingi tergep-tekserýdiń biryńǵaı tizilimine engizildi. Kúdiktiler birneshe adam, olardyń ishinde úsh saýnany jalǵa alýshy da, ákimshiler de bar. Saýnalarda aqshaǵa ıntımdik qyzmetter kórsetilip kelgen», - dedi SQO PD krımınaldyq polıtsııa basqarmasynyń bastyǵy Petr Klımov.
Sondaı-aq málim etilgendeı, M.Jumabaev aýdanynda el aýmaǵynda qujatsyz jáne tirkelmeı júrgen Ózbekstan Respýblıkasynyń 41 jastaǵy turǵyny anyqtaldy. Sot qaýlysyna sáıkes sheteldik jeke tulǵasy anyqtalǵanǵa deıin qabyldap-taratý ornyna qamaldy. Qaıyrshylyq úshin 40 adam ákimshilik jaýapqa tartyldy.