SQO-da sáýir aıynyń sońynda sý tasqyny bolýy múmkin - sınoptıkter
PETROPAVL. QazAqparat – Soltústik Qazaqstan oblysynda sınoptıkter kóktemgi sý tasqynyn sáýir aıynyń sońynda bolady dep boljady. Al Petropavlda Esil ózeni mamyr aıynyń basynda tasymaq, dep habarlaıdy QazAqparat tilshisi.
«Qazgıdromet» RMK SQO fılıalynyń mamandary naýryz aıynan bastap gıdrologııalyq beketter arqyly ózen-kólderdegi, sý qoımalaryndaǵy ózgeristi baqylaýǵa alǵan. Óńirde 19 gıdrologııalyq beket bar, onyń 16-sy Esil ózeni men onyń salalarynda ornalasqan. Ekeýi Petropavl jáne Sergeev sý qoımalarynda jáne bireýi Úlken Torańǵul kólinde tur.
Baqylaý kúnine eki ret tańǵy saǵat 8.00-de jáne keshki saǵat 20.00-de júrgiziledi. Sý kóterile bastaǵasyn-aq gıdrologııalyq beketterde sý deńgeıin tekserý jıiligi artady.
«Naýryz aıynda ınjener-gıdrologtar gıdrologııalyq toraptardy qarap shyqty. Qazirgi ýaqytta barlyq beketter tekserý júrgizýge qajet kerek-jaraqpen tolyq qamtylǵan.
Sergeev sý qoımasy búginde 76 %-ǵa tolǵan. Ótken jylmen salystyrǵanda bul kórsetkish tómen, byltyr osy kezde 86 %-ǵa tolǵan edi. Jalpy bul sý qoımasynda tasqyn kezinde 1 mlrd-tan 1,5 mlrd tekshe metrge deıin sý bolady degen boljam bar. Jalpy syıymdylyǵy 1,3 mlrd tekshe metr. Sergeev sý qoımasynan joǵary Esil ózenindegi sý qory jyldaǵy ortasha kórsetkishten 33 %-ǵa artyq, biraq, byltyrǵydan 33 %-ǵa kem», - deıdi «Qazgıdromet» RMK SQOF ınjeneri Roman Gırıchev.
Sınoptıkterdiń boljamynsha, aıdyń sońynda synap baǵanasy kóterilip, kún jylynady, shaǵyn ózenderde muz jaryla bastaıdy. Sáýir aıynyń birinshi onkúndiginde de aýa raıy jyly bolady, oblystyń shaǵyn ózenderinde sý deńgeıi kóterile bastaıdy. Al shaǵyn ózender arnasynan tek ekinshi onkúndikte shyǵady. Úshinshi onkúndikte Sergeev sý qoımasynan joǵary Esil ózeni tasıdy. Al Petropavlda Esil ózeni mamyr aıynyń basynda tasýy múmkin degen boljam bar.
«Sońǵy málimet boıynsha, oblysta qardaǵy sý qory birkelki emes. Eń tómen kórsetkish Aqjar jáne Taıynsha aýdandarynda tirkeldi, 16 mm-den 29 mm-ge deıin ǵana. Eń joǵary sý qory Aqqaıyń, Tımırıazev, Ýálıhanov jáne Ǵabıt Músirepov atyndaǵy aýdandarda, 80-84 mm aralyǵynda. Qalǵan aýdandarda jyldaǵy normaǵa sáıkes», - deıdi Roman Gırıchev.
