SQO-da satýshy zeınetkerge mln teńgege sapasyz estý apparatyn satqan

PETROPAVL. KAZINFORM – Soltústik Qazaqstan oblysynda jyl basynan beri saýda jáne tutynýshylardyń quqyqtaryn qorǵaý departamentine turǵyndardan 178 ótinish tústi.

Vedomstvo basshysynyń orynbasary Lázim Mııashevanyń aıtýynsha, tutynýshylar shaǵymynyń basym bóligi bólshek saýdaǵa qatysty, ekinshi orynda elektrondyq saýda tur. Sondaı-aq turǵyndar turǵyn úı-kommýnaldyq sharýashylyq jáne turmystyq qyzmet kórsetý sapasyna da jıi aryzdanady. 

- Tutynýshylar ótinishteriniń 47,7% qanaǵattandyryldy, 18,5% basqa memlekettik organdarǵa jiberildi, 5,6% másele bizdiń aralasýymyzsyz oń sheshilip, qaıtaryldy. Qalǵan ótinishter boıynsha túsiniktemeler berildi. Bıyldan bastap tutynýshylardyń quqyǵyn qorǵaýda Zań kúsheıtildi. Eger buryn kásipkerlik sýbektileri «eskertý» túrindegi ákimshilik jaýapkershilikke tartylsa, endi jeke tulǵalarǵa – 5, shaǵyn kásipkerlik sýbektilerine – 10, orta kásipkerlik sýbektilerine – 15, iri kásipkerlik sýbektilerine 25 AEK mólsherinde aıyppul salynady, - deıdi Lázim Mııasheva.

Departamentke shaǵymdanǵandardyń biri - 986 myń teńgege estý apparatyn satyp alǵan zeınetker áıel. Taýar sapasyz bolyp, aqshasyn qaıtarmaq bolǵan. Biraq satýshy sózbuıdaǵa salyp, tutynýshy talabyn oryndaýǵa asyqpaǵan.

- Jospardan tys tekserý júrgizip, satýshy aqshany qaıtardy. Sonymen birge, ol zańǵa sáıkes óz mindetin oryndamaǵany úshin ákimshilik jaýapkershilikke tartylyp, 60 myń teńgege jýyq aıyppul salyndy. Al Petropavl turǵynyna gıpermarkette «romashka» dep atalatyn nan kórsetilgen baǵa - 249 teńgege emes, 360 teńgege satylǵan. Zańbuzýshylyq rastalyp, satýshy quqyq buzýshylyq faktisin moıyndady. Oǵan da 15 AEK mólsherinde aıyppul salynyp, qysqartylǵan tártippen osy somanyń 50% tóledi, - deıdi Lázim Mııasheva.

Buǵan deıin Petropavlda túlekterge attestat tapsyrý rásiminde mekteptiń tóbesi qulaǵanyn jazǵan edik.