SQO-da sanıtarııalyq qyzmet jumys ýaqytyn ózgertti

PETROPAVL. KAZINFORM — Soltústik Qazaqstan oblysynda sanıtarııalyq qyzmet jumysty endi bir saǵatqa erte bastaıdy.

SQO sanıtarııalyq-epıdemıologııalyq baqylaý departamenti óńirde memlekettik organdar arasynda jumys kestesin aýystyrǵandardyń alǵashqysy.

Vedomstvonyń málimetinshe, Densaýlyq saqtaý mınıstrligi Sanıtarııalyq-epıdemıologııalyq baqylaý komıteti tóraǵasynyń mindetin atqarýshynyń buıryǵyna sáıkes, oblystyń sanıtarııalyq-epıdemıologııalyq baqylaý departamentiniń jáne onyń aýdandyq basqarmalarynyń jumys ýaqyty rejımi ózgerdi.

Jańa keste boıynsha endi saǵat 08:00–den 17:30–ǵa deıin jumys, al túski úzilis saǵat 13:00–den 14:30–ǵa deıin ózgerissiz qaldy.

— Aýystyrmas buryn bizdiń pikirimizdi bildi, saýalnama júrgizdi. Jumys ýaqytynyń úsh nusqasy boldy, birinshisi — ózgerissiz qaldyrý, ekinshisinde jumysty saǵat 8,30-da, al úshinshisinde saǵat 8.00-de bastaý usynyldy.

Bizdiń komıtet jańa jumys kestesine tolyq aýysqannan keıin bizge de jańa rejımmen isteý yńǵaıly, — deıdi departamenttiń bas mamany Aınash Saǵandyqova.

Esterińizge salaıyq, Shyǵys Qazaqstan oblysynyń birqatar aýdany jumys ýaqytyn kóktemde bir saǵatqa shegergen bolatyn.